معرکۂ حق پر آئی ایس پی آر کی ڈاکومنٹری ریلیز

معرکۂ حق میں پاکستان کی شاندار کامیابی کے بعد آئی ایس پی آر کی جانب سے ایک مستند اور حقائق پر مبنی ڈاکومنٹری جاری کی گئی ہے، جسے ناظرین کی جانب سے بھرپور پذیرائی حاصل ہو رہی ہے۔ڈاکومنٹری میں معرکۂ حق سے متعلق تمام اہم واقعات کو ترتیب وار پیش کیا گیا ہے۔ خاص طور پر بھارتی زیر انتظام علاقے پہلگام میں ہونے والے واقعے کو "فالس فلیگ آپریشن” قرار دیا گیا ہے، جس پر خود بھارتی شہریوں کی جانب سے بھی شدید سوالات اٹھائے جا رہے ہیں۔ آئی ایس پی آر کی جانب سے جاری کردہ اس ڈاکومنٹری میں بتایا گیا ہے کہ اگر بھارت کے دعوے درست ہوتے تو اس کے پاس شواہد ضرور موجود ہوتے، جیسے کہ مبینہ حملہ آوروں کو گرفتار کرنا یا کوئی ٹھوس ثبوت دنیا کے سامنے لانا، لیکن بھارت تاحال ایسا کرنے میں ناکام رہا ہے۔

ڈاکومنٹری میں دکھایا گیا ہے کہ بھارتی عوام خود بھی پہلگام واقعے کے ذمہ داران کے خلاف کارروائی کا مطالبہ کر رہے ہیں۔ اس موقع پر وزیراعظم پاکستان شہباز شریف کی جانب سے واقعے کی غیر جانبدارانہ تحقیقات کی پیشکش کو بھی واضح انداز میں اجاگر کیا گیا ہے۔ڈاکومنٹری میں ڈی جی آئی ایس پی آر کی جانب سے کئی اہم حقائق اور شواہد کو شامل کیا گیا ہے، جن میں بین الاقوامی میڈیا کی رپورٹنگ، بھارتی طیاروں کے گرنے کے شواہد، اور مساجد و عام شہریوں پر حملوں کی ویڈیوز بھی شامل ہیں۔ ریلیز کردہ ڈاکومنٹری میں  جو بھی مواد پیش کیا گیا ہے، وہ سچ پر مبنی ہے اور ہر دعوے کے ساتھ تصویری، وڈیوز یا بیانات کی صورت میں شواہد بھی موجود ہیں۔