لیبیا کی افواج کے سربراہ کی فیلڈ مارشل جنرل سید عاصم منیر سے اہم ملاقات

راولپنڈی میں لیبیا کی افواج کے کمانڈر انچیف لیفٹیننٹ جنرل صدام خلیفہ حفتر نے چیف آف آرمی اسٹاف فیلڈ مارشل جنرل سید عاصم منیر، نشانِ امتیاز (ملٹری) سے جنرل ہیڈکوارٹرز (جی ایچ کیو) میں ملاقات کی۔ آئی ایس پی آر کے مطابق، ملاقات میں باہمی دلچسپی کے امور، خطے کی سکیورٹی صورتحال، موجودہ چیلنجز اور دفاعی تعاون پر تفصیلی تبادلہ خیال کیا گیا۔ دونوں افواج کے درمیان دفاعی صنعت میں اشتراک اور تکنیکی مہارتوں کے تبادلے پر بھی اتفاق کیا گیا۔ ملاقات کے دوران خطے میں امن و استحکام کے لیے مشترکہ کوششوں پر زور دیا گیا جبکہ موجودہ سکیورٹی چیلنجز سے مؤثر انداز میں نمٹنے کے لیے حکمت عملی پر بھی بات چیت ہوئی۔ لیفٹیننٹ جنرل حفتر نے جی ایچ کیو آمد پر یادگارِ شہداء پر حاضری دی، پھولوں کی چادر چڑھائی اور شہداء کو خراجِ عقیدت پیش کیا۔ اس موقع پر پاکستان آرمی کے چاق و چوبند دستے نے انہیں گارڈ آف آنر پیش کیا۔ آئی ایس پی آر کے مطابق، یہ دورہ پاکستان اور لیبیا کے درمیان بڑھتے ہوئے دفاعی روابط اور باہمی تعاون کا مظہر ہے، جس سے دونوں ممالک کے درمیان عسکری تعلقات مزید مضبوط ہوں گے۔