اختتامی تقریب میں میزبان پاکستان کو نظر انداز کرنے پر پی سی بی سخت خفا

دبئی میں کھیلے گئے آئی سی سی چیمپیئنز ٹرافی کا فائنل ختم ہونے پر ٹرافی اور دوسرے ایوارڈز دینے کی تقریب ہوئی جس میں آئی سی سی کے چیئرمین جے شاہ، بھارتی کرکٹ بورڈ کے صدر راجربینی، سیکرٹری بی سی بی آئی اور نیوزی لیند کرکٹ بورڈ کے راجر ٹوز موجود تھے۔ پاکستان جو اس ایونٹ کا میزبان تھا حیران کن طور پر پاکستان کرکٹ بورڈ کے کسی نمائندے کو آئی سی سی نے مدعو نہیں کیا۔ محسن نقوی ناسازی طبعیت کی بنا پر اس تقریب میں شریک نہ ہوئے جنہوں نے فائنل پر عدم دستیابی کے بارے میں آئی سی سی کو آگاہ کر دیا گیا تھا کہ سمیر احمد سید فائنل پر پاکستان کی نمائندگی کریں گے۔ پی سی بی کے چیف آپریٹنگ آفیسر اور ٹورنامنٹ ڈائریکٹر سمیر احمد سید وہاں موجود تھے لیکن آئی سی سی نے ان کو اس تقریب میں مدعو نہیں کیا۔

ٹی وی چینلزکی رپورٹس کے مطابق پی سی بی حکام اس حوالے سے باقاعدہ طور پر آئی سی سی کو خط لکھنے کا ارادہ رکھتے ہیں تاکہ ان سے وضاحت مانگی جائے کہ میزبان بورڈ کو نظر انداز کیوں کیا گیا۔ ماضی میں آئی سی سی ایونٹس پر میزبان ملک کی اسٹیج پر نمائندگی ہوتی رہی ہے مگر اس مرتبہ  دبئی میں اس روایت کی پاسداری نہیں کی گئی جس پر پی سی بی حکام کے ساتھ  پاکستانی کرکٹ پرستار بھی آئی سی سی کے اس رویے پر سخت خفا ہیں۔