سونا نئی بلند ترین سطح پر ، فی تولہ 4 لاکھ 28 ہزار 200 روپے کا

ملک بھر میں سونے کی قیمت میں ایک بار پھر نمایاں اضافہ ریکارڈ کیا گیا ہے، جس کے بعد فی تولہ سونا تاریخ کی بلند ترین سطح پر پہنچ گیا۔آل سندھ صرافہ جیمز اینڈ جیولرز ایسوسی ایشن کے مطابق پیر کے روز 24 قیراط سونے کی فی تولہ قیمت میں 5 ہزار 500 روپے کا اضافہ ہوا، جس سے نئی قیمت 4 لاکھ 28 ہزار 200 روپے ہو گئی۔اسی طرح 10 گرام سونا 4 ہزار 715 روپے مہنگا ہو کر 3 لاکھ 67 ہزار 112 روپے کا ہو گیا، جو گزشتہ کاروباری ہفتے کے اختتام پر 3 لاکھ 62 ہزار 397 روپے تھا۔ ایسوسی ایشن کے مطابق سونے کی قیمت میں اضافے کی بڑی وجہ عالمی منڈی میں قیمتوں میں تیزی ہے، جہاں فی اونس سونا 55 ڈالر بڑھ کر 4 ہزار 71 ڈالر تک جا پہنچا۔ دوسری جانب چاندی کی قیمت میں بھی اضافہ ریکارڈ کیا گیا , 10 گرام چاندی 147 روپے بڑھ کر 4 ہزار 498 روپے ہو گئی، جبکہ عالمی منڈی میں فی اونس چاندی کی قیمت 51.60 ڈالر رہی۔ ماہرین کے مطابق عالمی معاشی غیر یقینی صورتحال، مشرقِ وسطیٰ میں کشیدگی اور ڈالر کی قدر میں اتار چڑھاؤ سونے کی قیمتوں میں اضافے کا باعث بن رہے ہیں۔