دریائے چناب میں بلند سطح کا سیلاب، مظفرگڑھ کے دیہات زیرِ آب

بالائی علاقوں اور پنجاب میں جاری مسلسل بارشوں نے دریائے چناب میں خطرناک سیلابی ریلا پیدا کردیا جس کے نتیجے میں مظفرگڑھ کی تحصیلیں اور سینکڑوں دیہات پانی میں ڈوب گئے۔ سیلابی ریلے نے جتوئی اور علی پور کو شدید متاثر کیا جبکہ موضع جات اور شہر سلطان میں بھی پانی داخل ہوگیا ہے۔ حالات بگڑنے پر ضلع بھر میں ہنگامی صورتحال نافذ کر دی گئی ہے۔ ڈی پی او سید غضنر علی شاہ کے مطابق ریسکیو آپریشن کے لیے پاک فوج کو طلب کر لیا گیا ہے۔ اس وقت پنجاب پولیس، ریسکیو 1122 اور دیگر ضلعی ادارے ریسکیو کارروائیوں میں مصروف ہیں، جب کہ ریسکیو 1122 کی 32 کشتیاں مسلسل متاثرہ علاقوں میں امدادی سرگرمیاں انجام دے رہی ہیں۔ ریسکیو 1122 کے مطابق اب تک 4 ہزار 686 افراد کو نشیبی علاقوں سے بحفاظت نکالا جا چکا ہے۔ تاہم دریائے چناب میں پانی کی سطح برقرار رہنے اور وقفے وقفے سے بارش جاری رہنے کے سبب حفاظتی بندوں کی حالت نہایت تشویشناک ہے۔ دوسری جانب دریائے راوی اور دریائے ستلج میں بھی اونچے درجے کا سیلاب جاری ہے، جس نے اوکاڑہ کے سیلاب زدہ علاقوں کو اپنی لپیٹ میں لے لیا۔ صورتحال کے پیش نظر محکمہ تعلیم نے متاثرہ 32 موضع جات کے تمام سرکاری و نجی اسکولوں کی چھٹیوں میں 8 سے 14 ستمبر تک توسیع کا اعلان کر دیا ہے۔محکمہ تعلیم کے جاری کردہ نوٹیفکیشن کے مطابق یہ فیصلہ سیلابی ہنگامی صورتحال اور عوامی تحفظ کو مدنظر رکھتے ہوئے کیا گیا ہے۔