مٹھی بھر دہشتگرد بلوچستان اور پاکستان کی ترقی و خوشحالی کا راستہ نہیں روک سکتے

ڈائریکٹر جنرل انٹرسروسز پبلک ریلیشنز (ڈی جی آئی ایس پی آر) لیفٹیننٹ جنرل احمد شریف چوہدری کا کنگ ایڈورڈ میڈیکل یونیورسٹی آمد پر طلبہ و طالبات نے فقیدالمثال جوش و خروش سے استقبال کیا، جہاں ایک فکری، علمی اور قومی جذبے سے لبریز نشست کا انعقاد کیا گیا۔ اس موقع پر لیفٹیننٹ جنرل احمد شریف چوہدری نے قوم کے نوجوان معماروں سے خطاب کرتے ہوئے کہا کہ بلوچ عوام پاکستان کی تاریخ، مذہب، ثقافت اور روایات کے انمول رشتوں میں صدیوں سے جُڑے ہوئے ہیں۔ انہوں نے اس عزم کا اعادہ کیا کہ پاکستان کی ترقی، امن اور خوشحالی کی راہ میں کوئی بھی مٹھی بھر شرپسند یا دہشت گرد رکاوٹ نہیں بن سکتا۔ ڈی جی آئی ایس پی آر نے آپریشن بنیان المرصوص کی تفصیلات پیش کرتے ہوئے اس کی عسکری حکمت عملی، قربانیوں اور تاریخی کامیابیوں کو اجاگر کیا۔ انہوں نے کہا کہ یہ صرف ایک فوجی آپریشن نہیں بلکہ حق اور باطل کے درمیان ایک فیصلہ کن معرکہ تھا، جس میں کامیابی صرف بندوق سے نہیں بلکہ عوام کی دعاؤں اور نوجوانوں کے جذبے سے ممکن ہوئی۔ انہوں نے پرعزم انداز میں کہا:

"کشمیر پاکستان کی شہ رگ تھا، ہے اور ہمیشہ رہے گا۔”

کنگ ایڈورڈ یونیورسٹی کے طلبہ نے مسلح افواج کو زبردست خراجِ تحسین پیش کرتے ہوئے کہا کہ وہ ملک کی حفاظت کرنے والے ان جانبازوں کی قربانیوں کو کبھی فراموش نہیں کریں گے۔ انہوں نے مزید اس خواہش کا اظہار کیا کہ ایسی فکری نشستیں اور مکالمے تسلسل کے ساتھ جاری رہیں، تاکہ نوجوان نسل براہِ راست قومی امور سے باخبر اور باہمت رہے۔ یہ ملاقات محض ایک تقریب نہ تھی، بلکہ قومی یکجہتی، شعور، حب الوطنی اور فکری بصیرت کا ایک تاریخی لمحہ تھی ۔