چاہت فتح علی خان کا بڑا دعویٰ: پاکستان میں میوزک و ایکٹنگ اکیڈمی قائم

معروف کامیڈین گلوکار چاہت فتح علی خان نے دعویٰ کیا ہے کہ انہوں نے پاکستان میں میوزک، ایکٹنگ و ماڈلنگ اکیڈمی کا باقاعدہ آغاز کر دیا ہے، جہاں انہیں ابتدائی مرحلے میں ہی 400 سے زائد داخلہ درخواستیں موصول ہو چکی ہیں۔ لندن میں سوشل میڈیا انفلوئنسرز سے گفتگو کرتے ہوئے چاہت فتح علی خان نے کہا کہ ان کی اکیڈمی میں موسیقی کے ساتھ ساتھ اداکاری بھی سکھائی جا رہی ہے، اور اگلے مرحلے میں وہ آن لائن کلاسز کا آغاز کریں گے تاکہ پاکستان سمیت دنیا بھر کے نوجوان اس پلیٹ فارم سے فائدہ اٹھا سکیں۔ چاہت فتح علی خان کا کہنا تھا کہ اکیڈمی میں داخلے کے لیے کسی سخت شرط کی ضرورت نہیں، "بس سیکھنے کا جذبہ ہونا چاہیے”۔ انہوں نے دعویٰ کیا کہ اگر کسی کی آواز بے سری بھی ہو، تو وہ اسے 6 ماہ کی تربیت کے بعد بہتر بنا دیں گے، اور سیکھنے والے طالبعلموں کا پہلا گانا بھی ریلیز کیا جائے گا۔  کامیڈین کا کہنا تھا کہ جلد ہی وہ اپنی میوزک اکیڈمی کی موبائل ایپلی کیشن بھی لانچ کریں گے تاکہ نوجوان گھر بیٹھے موسیقی سیکھ سکیں۔ انہوں نے یہ بھی انکشاف کیا کہ وہ اداکاری کی تربیت بھی دے رہے ہیں، اور جلد ہی ان کی فیچر فلم دنیا بھر کے سینما گھروں میں ریلیز کی جائے گی۔ تاہم، چاہت فتح علی خان نے اکیڈمی کے مقام، پتے یا ویب سائٹ سے متعلق کوئی واضح تفصیلات فراہم  نہیں کیں۔ یاد رہے کہ انہوں نے فروری 2025 میں ایک پریس بیان میں پاکستان میں میوزک و ماڈلنگ اکیڈمی کھولنے کا اعلان کیا تھا۔