عالمی میڈیا میں پاکستان کے کردار کی دھوم

عالمی میڈیا نے پاکستان کی سفارتکاری کے شاندار معرکے کو خراجِ تحسین پیش کر دیا ہے۔ خلیجی میڈیا نے لکھا ہے کہ پاکستان نے حالیہ ممکنہ جنگ کے خاتمے میں بہترین اور فیصلہ کن کردار ادا کیا، جس کے نتیجے میں امریکی صدر ڈونلڈ ٹرمپ نے حملوں کو روک دیا۔ برطانوی خبر رساں ادارے نے پاکستان کو سراہتے ہوئے کہا کہ وہ امریکہ اور ایران کے درمیان ایک طاقتور، معتبر اور موثر ثالث کے طور پر ابھر کر سامنے آیا ہے۔ امریکی ٹی وی چینلز نے نشاندہی کی کہ صدر ٹرمپ نے واضح طور پر کہا ہے کہ وزیراعظم محمد شہباز شریف اور فیلڈ مارشل سید عاصم منیر سے ہونے والی اہم بات چیت کے بعد ہی لڑائی روکنے کا فیصلہ کیا گیا۔  برطانوی ٹی وی نے تعریف کرتے ہوئے کہا کہ پاکستان نے خطے میں امن و استحکام کے لیے کئی ہفتوں کی مسلسل اور حکیمانہ کاوشوں کے بعد کامیابی حاصل کر لی ہے۔ خلیجی میڈیا کے تجزیہ کاروں کا کہنا ہے کہ پاکستان نے اپنے ایران اور امریکہ دونوں کے ساتھ دیرینہ، گہرے اور متوازن تعلقات کی بدولت خود کو خطے میں امن کا بااعتماد ضامن ثابت کر دیا ہے۔ یاد رہے کہ امریکی صدر ڈونلڈ ٹرمپ نے وزیراعظم شہباز شریف کی دو ہفتوں کی جنگ بندی کی درخواست کو قبول کر لیا، جو اب عالمی سطح پر پاکستان کی سفارتی حکمتِ عملی کی ایک زبردست کامیابی کے طور پر دیکھا جا رہا ہے۔پاکستان نے ایک بار پھر دنیا کو بتایا کہ جب بات امن کی ہو تو اس کی آواز اور کاوشیں سب سے زیادہ وزن رکھتی ہیں۔