آسٹریلیا کا ایرانی شہریوں پر عارضی سفری پابندیاں عائد کرنے کا اعلان

آسٹریلیا نے ایرانی شہریوں کے لیے ایک سخت اور فوری فیصلہ کرتے ہوئے عارضی سفری پابندیاں عائد کر دی ہیں۔ آسٹریلوی وزیر داخلہ نے اعلان کیا ہے کہ حکومت نے ایرانی وزیٹر ویزا ہولڈرز کے آسٹریلیا آنے پر فوری طور پر عارضی پابندی لگا دی ہے۔ یہ فیصلہ امیگریشن نظام کی سالمیت اور نظم و ضبط کو برقرار رکھنے کے لیے کیا گیا ہے۔ وزیر داخلہ کا کہنا ہے کہ ایران اور خطے میں جاری تنازع کی وجہ سے خدشہ ہے کہ کچھ وزیٹر ویزا ہولڈرز اپنے ویزے کی مدت ختم ہونے کے بعد مقررہ وقت پر واپس نہ جا سکیں۔ اس ممکنہ صورتحال سے بچنے کے لیے یہ پیشگی اقدام اٹھایا گیا ہے۔یہ پابندی عارضی ہے، تاہم اس سے ایرانی شہریوں کے لیے آسٹریلیا سفر کرنا فی الحال مشکل ہو گیا ہے۔ آسٹریلیا کا یہ فیصلہ بتاتا ہے کہ عالمی تنازعات اب صرف مشرق وسطیٰ تک محدود نہیں رہے بلکہ ان کے اثرات دور دراز ممالک کی پالیسیوں اور امیگریشن قوانین تک بھی پہنچ رہے ہیں۔ آنے والے دنوں میں دیکھنا ہوگا کہ یہ پابندی کب تک جاری رہتی ہے اور خطے کی صورتحال جب معمول پر آئے گی تو آسٹریلیا اس پر نظرثانی کرتا ہے یا نہیں۔