ماں بیٹی کے مین ہول میں گرنے پر داتا دربار منصوبے کی تمام ٹیم معطل

ڈائریکٹر جنرل لاہور ڈیولپمنٹ اتھارٹی طاہر فاروق نے بھاٹی چوک میں پیش آنے والے دلخراش واقعے، جس میں ماں اور بچی مین ہول میں گر کر جان سے ہاتھ دھو بیٹھیں، پر فوری اور سخت کارروائی کا حکم دے دیا ہے۔ واقعے کے بعد ڈی جی ایل ڈی اے نے داتا دربار منصوبے پر کام کرنے والی پوری ٹیم کو معطل کرتے ہوئے واضح پیغام دیا ہے کہ انسانی جانوں سے غفلت کسی صورت برداشت نہیں کی جائے گی۔ اس ضمن میں باقاعدہ نوٹیفکیشن بھی جاری کر دیا گیا ہے۔ نوٹیفکیشن کے مطابق منصوبے کے پروجیکٹ ڈائریکٹر، ڈپٹی ڈائریکٹر، اسسٹنٹ ڈائریکٹر اور سب انجینئر کو عہدوں سے معطل کر دیا گیا ہے، جبکہ ذمہ داران کے تعین کے لیے مزید کارروائی کا آغاز بھی کر دیا گیا ہے۔ ادھر ماں بیٹی کے سیوریج لائن میں گرنے کے افسوسناک واقعے کی ابتدائی تحقیقاتی رپورٹ بھی سامنے آ گئی ہے، جس نے منصوبے میں سنگین غفلت کے خدشات کو مزید تقویت دی ہے۔ ترجمان ایل ڈی اے کے مطابق ڈی جی ایل ڈی اے نے کنٹریکٹر کے خلاف فوری طور پر مقدمہ درج کروانے کی ہدایت جاری کر دی ہے، تاکہ ذمہ دار عناصر کو قانون کے کٹہرے میں لایا جا سکے۔ ترجمان نے بتایا کہ ڈی جی ایل ڈی اے کی ہدایت پر منصوبے سے منسلک نجی کمپنی اور ریزیڈنٹ انجینئر نیسپاک کو شوکاز نوٹس بھی جاری کر دیا گیا ہے۔ ایل ڈی اے کے مطابق نیسپاک کے ریزیڈنٹ انجینئر کی معطلی اور محکمانہ کارروائی و باقاعدہ انکوائری کی سفارش کی گئی ہے، جبکہ منصوبے میں نیسپاک ٹیم کے مجموعی کردار کو بھی تحقیقات کا حصہ بنانے کا فیصلہ کیا گیا ہے، تاکہ اس سانحے کے تمام پہلوؤں کو بے نقاب کیا جا سکے۔