قانون طاقت کے آگے جھکا تو دنیا عدم استحکام کی لپیٹ میں آجائے گی

اقوام متحدہ میں پاکستان کے مستقل مندوب عاصم افتخار نے زور دے کر کہا ہے کہ جموں و کشمیر پر بھارت کا غیرقانونی قبضہ جنوبی ایشیا میں عدم استحکام کی بنیادی وجہ ہے۔سلامتی کونسل میں امن، انصاف اور کثیر الجہتی نظام پر ہونے والے مباحثے میں خطاب کرتے ہوئے انہوں نے کہا کہ گزشتہ سال مئی کا تنازع یہ واضح کر گیا کہ کشمیری عوام کو حق خودارادیت سے محروم رکھنا عالمی امن کے لیے سنگین خطرہ ہے۔ عاصم افتخار نے بھارت کے سندھ طاس معاہدے کو معطل کرنے کے اقدام کو عالمی ذمہ داریوں کی کھلی خلاف ورزی قرار دیا اور کہا کہ یہ لاکھوں افراد کی زندگیوں اور روزگار کو شدید خطرے میں ڈال رہا ہے۔ پاکستان ایسے اقدامات کی سختی سے مخالفت کرتا ہے اور پانی و دیگر قدرتی وسائل کو ہتھیار کے طور پر استعمال کرنے کی کسی بھی کوشش کو مسترد کرتا ہے۔

انہوں نے عالمی برادری کو یاد دلایا کہ بین الاقوامی معاہدوں کی پاسداری ہی عالمی قانونی نظام کی بنیاد ہے اور عالمی قانون سب پر مساوی طور پر لاگو ہونا چاہیے۔ عاصم افتخار نے خبردار کیا کہ طاقت کی بالادستی اور غیر قانونی اقدامات خطے میں عدم استحکام کو مزید بڑھا رہے ہیں اور امن کے لیے سنگین خطرہ ہیں۔