شناختی کارڈ ڈیٹا کے تحفظ کیلئے نادرا کی نئی ایپ متعارف

نادرا نے شہریوں کے لیے ایک اہم اور جدید سہولت متعارف کرائی ہے جس کے ذریعے وہ اپنے شناختی کارڈ کے ڈیٹا پر خود نگرانی کر سکیں گے۔ نئی ڈیٹا مانیٹرنگ ایپ کے ذریعے ہر شہری جان سکے گا کہ اس کا شناختی ڈیٹا کہاں اور کس مقصد کے لیے استعمال ہوا ہے۔ ایپ پر ڈیٹا ویری فکیشن کی مکمل تاریخ دستیاب ہوگی، جس میں یہ واضح ہوگا کہ کس ادارے نے کب اور کس نوعیت کی تصدیق کی۔ اس سہولت سے شہری اپنے ڈیٹا کی حفاظت اور شفافیت پر براہ راست نظر رکھ سکیں گے۔ نادرا حکام کے مطابق اس اقدام سے شہریوں کے شناختی ڈیٹا کے غلط استعمال پر مؤثر چیک اینڈ بیلنس ممکن ہوگا، اور ڈیٹا لیک یا غیر قانونی تصدیق کے واقعات کی روک تھام میں مدد ملے گی۔

ایپ کے ذریعے پرائیویسی اور ڈیٹا سکیورٹی میں اضافہ ہوگا، جبکہ سائبر کرائم اور جعلی تصدیقی کیسز کی حوصلہ شکنی بھی ممکن ہوگی۔یہ ایپ خاص طور پر بیرون ملک مقیم پاکستانیوں کے لیے بھی اہم پیغام رکھتی ہے، جو اپنے شناختی ڈیٹا پر محفوظ اور موثر کنٹرول چاہتے ہیں۔