روسی تیل پر سیاسی دباؤ: ٹرمپ کی بھارت کو دھمکی

امریکی صدر ڈونلڈ ٹرمپ نے بھارت کو ایک بار پھر سخت تنبیہ کی ہے کہ اگر نئی دہلی روسی تیل کے معاملے میں واشنگٹن کے ساتھ تعاون نہیں کرتی تو امریکا بھارتی مصنوعات پر ٹیرف بڑھانے سمیت تجارتی پابندیوں پر غور کر سکتا ہے۔ غیر ملکی خبر رساں ادارے رائٹرز کے مطابق صدر ٹرمپ نے اپنے خطاب میں کہا کہ امریکا بھارت کے اقدامات اور مؤقف کا بغور جائزہ لے رہا ہے اور حالات کے مطابق مناسب تجارتی اقدام اٹھایا جائے گا۔ صدر ٹرمپ کے مطابق اگر بھارت تعاون نہیں کرتا تو واشنگٹن اپنی معاشی طاقت کے استعمال سے بھارتی تجارتی فوائد محدود کر سکتا ہے، جس میں ٹیرف میں اضافے کا امکان بھی شامل ہے۔ یہ بیان ایسے وقت سامنے آیا ہے جب امریکا اور بھارت کے درمیان تجارتی مذاکرات جاری ہیں اور دونوں ممالک اپنی اقتصادی تعلقات کو مزید مستحکم کرنے کے لیے بات چیت کر رہے ہیں۔

واضح رہے کہ اس سے قبل صدر ٹرمپ نے دعویٰ کیا تھا کہ بھارتی وزیر اعظم نریندر مودی نے انہیں یقین دہانی کرائی تھی کہ بھارت روسی تیل کی خریداری بند کر دے گا، تاہم اب تک بھارتی حکومت کی جانب سے اس دعوے کی باضابطہ تصدیق سامنے نہیں آئی۔