پاکستان کرکٹ بورڈ نے 2026 کے ٹی ٹوئنٹی ورلڈ کپ کے لیے ابتدائی اسکواڈ کے نام آئی سی سی کو ارسال کر دیے ہیں۔ ذرائع کے مطابق پی سی بی نے یہ نام مقررہ ڈیڈ لائن کے مطابق بھیجے ہیں اور 31 جنوری تک آئی سی سی کی اجازت کے بغیر اسکواڈ میں تبدیلی کا حق محفوظ رکھتا ہے۔ اس کے بعد کسی بھی تبدیلی کے لیے آئی سی سی کی ٹیکنیکل کمیٹی سے منظوری ضروری ہوگی۔ ابتدائی 15 رکنی اسکواڈ کے ساتھ ریزرو کھلاڑیوں کے نام بھی بھیجے جا چکے ہیں۔ پی سی بی کا منصوبہ ہے کہ سری لنکا کے خلاف جاری سیریز کے بعد ورلڈ کپ اور آسٹریلیا کے ساتھ شیڈول سیریز کے اسکواڈ کا حتمی اعلان کرے۔ اس دوران ایک سے دو کھلاڑیوں کی کارکردگی کو دیکھ کر حتمی ٹیم میں شامل یا خارج کرنے پر غور کیا جائے گا۔ ابتدائی اسکواڈ میں دورۂ سری لنکا کے کھلاڑیوں کے ساتھ ساتھ بابر اعظم، شاہین آفریدی اور حارث رؤف کے نام بھی شامل ہیں۔ آئی سی سی ٹی ٹوئنٹی ورلڈ کپ 7 فروری سے بھارت اور سری لنکا میں شروع ہو رہا ہے، اور پاکستان اپنی تمام میچز سری لنکا میں کھیلے گا۔ دورۂ سری لنکا کے اسکواڈ میں کپتان سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع اور محمد نواز شامل ہیں۔ علاوہ ازیں محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق بھی ٹیم کا حصہ ہیں۔
Discussion about this post