کروڑوں کے فراڈ میں مس یونیورس مقابلے کی شریک مالک کے وارنٹ گرفتاری

تھائی لینڈ میں خوبصورتی کے سب سے بڑے عالمی مقابلے مس یونیورس کی شریک مالک اور معروف میڈیا ٹائیکون این جکاپونگ جکرا جتاتیپ ایک بڑے قانونی بحران میں پھنس گئیں، جہاں جنوبی بنکاک کی عدالت نے ان کے خلاف وارنٹ گرفتاری جاری کر دیے ہیں۔ غیر ملکی میڈیا کے مطابق این جکرا جتاتیپ پر 9 لاکھ 30 ہزار ڈالر کے مبینہ فراڈ کا الزام ہے۔ یہ مقدمہ ایسے وقت میں سامنے آیا ہے جب مس یونیورس 2025 پہلے ہی جنسی امتیاز اور غیر شفاف فیصلوں جیسے تنازعات کی زد میں تھا۔ مس میکسیکو فاطمہ کی تاج پوشی کے فوراً بعد ہی یہ نیا ہنگامہ کھڑا ہوگیا، جس نے مقابلے کے مستقبل پر مزید سوالات کھڑے کر دیے۔ عدالتی دستاویزات کے مطابق ایک پلاسٹک سرجن نے دعویٰ کیا ہے کہ این جکرا جتاتیپ نے انہیں 2023 میں اپنی کمپنی میں سرمایہ کاری کی دعوت دیتے ہوئے اہم معلومات جان بوجھ کر چھپائیں، اور یہ بھی جانتی تھیں کہ وہ مقررہ مدت میں رقم واپس کرنے کی اہل نہیں ہیں۔

مدعی کے مطابق اسے دانستہ طور پر دھوکا دیا گیا۔ عدالت نے بتایا کہ 9 لاکھ 30 ہزار ڈالر کے اس فراڈ کیس کا فیصلہ منگل کو سنایا جانا تھا، لیکن این جکرا جتاتیپ سماعت میں پیش نہیں ہوئیں۔ ان کی غیر حاضری کو عدالت نے ”فرار کی کوشش“ قرار دیتے ہوئے فوری طور پر وارنٹ گرفتاری جاری کر دیے۔ این جکرا جتاتیپ مس یونیورس مقابلے کی عالمی شہرت یافتہ کاروباری شریک مالک ہونے کے ساتھ خود بھی ایک بڑی میڈیا شخصیت ہیں، تاہم ان کے خلاف جاری کارروائی نے نہ صرف ان کی ساکھ، بلکہ مس یونیورس تنظیم کے وقار کو بھی شدید دھچکا پہنچایا ہے۔ یہ معاملہ اب تھائی لینڈ اور عالمی میڈیا کی توجہ کا مرکز بن چکا ہے، جبکہ توقع کی جا رہی ہے کہ اگلے چند دنوں میں یہ کیس مزید پیچیدگیاں اختیار کرے گا۔