علیمہ خان کو گرفتار کرکے پیش کرنے کا حکم

انسدادِ دہشت گردی عدالت راولپنڈی نے علیمہ خان کی مسلسل غیر حاضری پر سخت کارروائی کرتے ہوئے انہیں گرفتار کر کے عدالت میں پیش کرنے کا حکم دے دیا۔تفصیلات کے مطابق انسدادِ دہشت گردی عدالت کے جج امجد علی شاہ نے علیمہ خان سمیت 11 ملزمان کے خلاف 26 نومبر کے احتجاج سے متعلق مقدمے کی سماعت کی۔ مقدمہ تھانہ صادق آباد میں درج ہے جس میں ملزمان پر جلاؤ گھیراؤ، کارِ سرکار میں مداخلت اور کارکنان کو پرتشدد احتجاج پر اکسانے کے الزامات عائد ہیں۔ عدالتی کارروائی کے دوران علیمہ خان اور ان کے وکلاء ایک بار پھر پیش نہ ہوئے، جس پر عدالت نے دسویں مرتبہ ان کے ناقابلِ ضمانت وارنٹِ گرفتاری جاری کر دیے۔ عدالت نے حکم دیا کہ علیمہ خان کو گرفتار کر کے 17 نومبر کو پیش کیا جائے۔ سماعت کے دوران مقدمے میں نامزد دیگر ملزمان عدالت میں موجود رہے۔ عدالت نے آئندہ سماعت 17 نومبر تک ملتوی کرتے ہوئے حکم دیا کہ علیمہ خان کی حاضری یقینی بنائی جائے۔واضح رہے کہ یہ مقدمہ گزشتہ برس 26 نومبر کے احتجاج کے دوران مبینہ طور پر سرکاری املاک کو نقصان پہنچانے اور عوامی امن میں خلل ڈالنے کے الزامات پر درج کیا گیا تھا۔