بھارت : ویمنز ورلڈ کپ کے دوران اندور میں آسٹریلوی کھلاڑی ہراسانی کا شکار

کرکٹ آسٹریلیا نے تصدیق کی ہے کہ اس کی قومی ویمنز ٹیم کی دو کھلاڑیوں کو اندور کی ایک سڑک پر پیش آئے مبینہ واقعے کے دوران ایک موٹر سائیکل سوار نے نامناسب طریقے سے چھوا۔ مقامی پولیس نے مبینہ واقعے میں ملوث ایک شخص کو گرفتار کر لیا ہے۔ یہ واقعہ خجرانہ روڈ کے علاقے میں اُس روز پیش آیا جب آسٹریلیا نے ہولکر اسٹیڈیم میں انگلینڈ کو چھ وکٹوں سے شکست دی تھی۔کرکٹ آسٹریلیا نے اپنے  جاری کردہ بیان میں کہا،
"کرکٹ آسٹریلیا تصدیق کرتا ہے کہ آسٹریلوی ویمنز ٹیم کی دو کھلاڑیوں کے قریب ایک موٹر سائیکل سوار آیا اور انہیں نامناسب طور پر چھوا، جب وہ اندور میں ایک کیفے کی طرف جارہی تھیں۔ یہ معاملہ ٹیم سیکیورٹی کی جانب سے پولیس کو رپورٹ کر دیا گیا ہے اور پولیس اس کی تفتیش کر رہی ہے۔”

آسٹریلوی خواتین کی ٹیم اس وقت بھارت میں ورلڈ کپ میں شرکت کے لیے موجود ہے جہاں وہ 2022 میں نیوزی لینڈ میں جیتے گئے ٹائٹل کا دفاع کر رہی ہے۔ ٹیم ہفتہ کے روز اندور میں جنوبی افریقہ کے خلاف میچ کھیلے گی جس کا آغاز آسٹریلین  وقت کے مطابق رات 8:30 بجے ہو گا۔ چھ میچ جیتنے کے بعد آسٹریلیا سیمی فائنل کے لیے پہلے ہی کوالیفائی کر چکا ہے۔