پاکستان–قطر تعلقات میں نئی پیش رفت، تجارت و سرمایہ کاری بڑھانے پر اتفاق

اسلام آباد میں وزیراعظم شہباز شریف اور قطر کے وزیرِ تجارت شیخ فیصل بن ثانی کی اہم ملاقات میں پاکستان اور قطر نے تجارت، سرمایہ کاری اور اقتصادی تعاون کو نئی سطح تک لے جانے پر اتفاق کیا ہے۔وزیراعظم نے اس موقع پر دوطرفہ تعلقات کی مثبت سمت پر اطمینان کا اظہار کرتے ہوئے کہا کہ پاکستان اور قطر کے تعلقات مشترکہ عقیدے، اقدار اور باہمی احترام پر استوار ہیں۔ انہوں نے قطر کو پاکستان کا اہم شراکت دار اور خطے میں ایک بااثر ثالث کے طور پر سراہا۔ وزیراعظم شہباز شریف نے مزید کہا کہ پاکستان سرمایہ کار دوست پالیسیوں کے ساتھ غیر ملکی سرمایہ کاروں کے لیے وسیع مواقع فراہم کر رہا ہے۔ ان کا کہنا تھا کہ دونوں ممالک کے درمیان توانائی، زراعت، غذائی تحفظ، آئی ٹی، سیاحت اور بنیادی ڈھانچے کے شعبوں میں تعاون کے بے شمار امکانات موجود ہیں۔ انہوں نے قطری سرمایہ کاروں کو ان شعبوں میں نئی راہیں تلاش کرنے کی دعوت دی۔ قطری وزیرِ تجارت شیخ فیصل بن ثانی نے قطر کی قیادت کی جانب سے نیک تمنائیں پہنچائیں اور پاکستان کے ساتھ معاشی تعلقات کو مزید مضبوط بنانے کے عزم کا اعادہ کیا۔ ملاقات میں یہ بھی طے ہوا کہ دونوں ممالک باہمی مفاہمت کو عملی شکل دینے کے لیے قریبی رابطہ کاری جاری رکھیں گے۔