آرمی چیف فیلڈ مارشل سید عاصم منیر نے کہا ہے کہ بلوچستان میں دیرپا خوشحالی اور سماجی و معاشی استحکام کے لیے سیاسی مفادات سے بالاتر ہو کر جامع قومی حکمتِ عملی کے تحت کام کرنے کی ضرورت ہے۔پاک فوج کے شعبۂ تعلقات عامہ (آئی ایس پی آر) کے مطابق، فیلڈ مارشل سید عاصم منیر نے جنرل ہیڈکوارٹرز میں 17ویں نیشنل ورکشاپ بلوچستان کے شرکا سے ملاقات کے دوران کہا کہ بلوچستان پاکستان کا فخر ہے، جہاں کے عوام محب وطن، باصلاحیت اور باحوصلہ ہیں۔ یہی عوام اس صوبے کا حقیقی سرمایہ ہیں۔آرمی چیف نے وفاقی و صوبائی حکومتوں کے جاری ترقیاتی اقدامات کا حوالہ دیتے ہوئے کہا کہ یہ منصوبے عوامی فلاح و بہبود کو مدِنظر رکھتے ہوئے بلوچستان کے سماجی و معاشی
ڈھانچے کی بہتری کے لیے تشکیل دیے گئے ہیں۔ انہوں نے اس امر پر زور دیا کہ صوبے کی بے پناہ معاشی صلاحیت کو بلوچستان کے عوام کی بہتری کے لیے بروئے کار لایا جانا چاہیے۔
فیلڈ مارشل سید عاصم منیر نے سول سوسائٹی کے مثبت کردار اور نوجوانوں کی شمولیت کو سراہتے ہوئے کہا کہ نوجوانوں کی رہنمائی اور بااختیار بنانا پائیدار ترقی کے لیے ناگزیر ہے۔ آرمی چیف نے یہ بھی واضح کیا کہ بھارت کی سرپرستی میں چلنے والی پراکسیز، فتنہ الہند اور فتنہ الخوارج بلوچستان میں عوام دشمن ایجنڈے کو فروغ دے رہے ہیں تاکہ صوبے میں بد امنی اور تشدد کو ہوا دی جا سکے۔ انہوں نے یقین دلایا کہ ایسی دہشت گرد کوششوں کے مکمل سدباب کے لیے تمام ضروری اقدامات کیے جا رہے ہیں اور صوبے کو اس لعنت سے نجات دلائی جائے گی۔فیلڈ مارشل سید عاصم منیر نے اس عزم کا اظہار کیا کہ پاکستان خطے میں امن کا خواہاں ہے، تاہم ملکی سرحدی سالمیت کے خلاف کسی بھی اندرونی یا بیرونی جارحیت کا فیصلہ کن جواب دیا جائے گا تاکہ پاکستانی شہریوں کی جان و مال کا تحفظ یقینی بنایا جا سکے۔آئی ایس پی آر کے مطابق ورکشاپ کا اختتام سوال و جواب کے ایک تفصیلی سیشن پر ہوا۔
Discussion about this post