لاہور ہائی کورٹ راولپنڈی بینچ کے حکم پر نیشنل ڈیٹا بیس اینڈ رجسٹریشن اتھارٹی (نادرا) نے مکمل قانونی جانچ پڑتال کے بعد ارشد چائے والا کا قومی شناختی کارڈ اور پاسپورٹ بحال کر دیا۔ یاد رہے کہ 9 اپریل 2025 کو نادرا نے ارشد چائے والا کی شہریت سے متعلق شکوک کی بنیاد پر ان کے تمام شناختی دستاویزات بلاک کرتے ہوئے انہیں افغان شہری قرار دینے کا شبہ ظاہر کیا تھا۔ اس اقدام کے خلاف ارشد خان نے عدالت سے رجوع کیا، جس پر ان کا کیس گزشتہ کئی ماہ سے سماعت کے مراحل میں تھا۔ عدالت نے نادرا حکام کو مفصل رپورٹ پیش کرنے کا حکم دیا تھا۔ 20 اکتوبر کے عدالتی احکامات پر عمل کرتے ہوئے نادرا کے تفتیشی بورڈ نے ارشد خان کے ذاتی کوائف، ان کے آبا و اجداد کی شہریت کی تفصیلات اور ریکارڈ کا باریک بینی سے جائزہ لیا، جس کے نتیجے میں یہ واضح ہوا کہ ان کی دستاویزات بلاک کرنا ادارے کی جانب سے ایک انتظامی غلطی تھی۔ چنانچہ نادرا نے اپنی غلطی تسلیم کرتے ہوئے دونوں دستاویزات فوراً بحال کر دیں۔ ارشد خان نے فیصلے پر خوشی کا اظہار کرتے ہوئے کہا:
“آج مجھے دوبارہ اس بات پر فخر ہے کہ میں پاکستانی ہوں۔ میں پہلے کی طرح اپنے کام اور ملک کی خدمت جاری رکھوں گا۔”
ارشد خان المعروف "ارشد چائے والا” کا تعلق مردان سے ہے۔ انہیں 2016 میں عالمی شہرت اُس وقت ملی جب ایک فوٹوگرافر نے ان کی چائے بناتے ہوئے تصویر انسٹاگرام پر پوسٹ کی، جو دیکھتے ہی دیکھتے دنیا بھر میں وائرل ہوگئی۔ بعد ازاں ارشد نے ماڈلنگ کی دنیا میں قدم رکھا، پھر اسلام آباد سمیت ملک کے بڑے شہروں میں شاندار چائے خانے کھولے اور بیرونِ ملک بھی اپنے کیفے برانڈ کو توسیع دی۔
Discussion about this post