بالی وُڈ فلم دنگل سے شہرت پانے والی سابق اداکارہ زائرہ وسیم نے طویل عرصے کے بعد اپنی ذاتی زندگی کی ایک اہم خبر سوشل میڈیا پر شیئر کر دی۔ انسٹاگرام پر جاری تصاویر میں سے ایک میں انہیں نکاح نامے پر دستخط کرتے دیکھا جا سکتا ہے، جب کہ دوسری تصویر میں وہ اپنے شوہر کے ساتھ کھڑی ہیں۔23 سالہ زائرہ وسیم نے دونوں تصاویر میں اپنا اور اپنے شریکِ حیات کا چہرہ پوشیدہ رکھا ہے اور نہ ہی شوہر کی شناخت یا شادی کے مقام و تفصیل سے متعلق کوئی معلومات فراہم کی ہیں۔ تصویروں کے ساتھ انہوں نے مختصر مگر معنی خیز دو لفظ لکھے: "قبول ہے”۔زائرہ وسیم نے 16 سال کی عمر میں عامر خان کی بلاک بسٹر فلم دنگل میں گیتا پھوگاٹ کا کردار ادا کر کے شہرت حاصل کی، بعد ازاں انہوں نے سیکریٹ سپرسٹار میں کام کیا اور متعدد ایوارڈز اپنے نام کیے۔ ان کی آخری فلم دی اسکائے از پنک تھی جس میں وہ پرینکا چوپڑا کے ساتھ جلوہ گر ہوئی تھیں۔
View this post on Instagram
تاہم شہرت کے عروج پر 2019 میں انہوں نے اعلان کیا کہ وہ شوبز کی دنیا سے کنارہ کشی اختیار کر رہی ہیں، کیونکہ فلمی کیریئر ان کی مذہبی اور روحانی ترجیحات سے متصادم ہے۔ شوبز چھوڑنے کے بعد انہوں نے اپنے تمام فین پیجز سے درخواست کی تھی کہ ان کی تصاویر اپنے اکاؤنٹس سے ہٹا دی جائیں، کیونکہ وہ نیا باب شروع کرتے ہوئے خود کو ہر سطح پر اس دنیا سے الگ کرنا چاہتی ہیں۔ان کا کہنا تھا کہ اگرچہ انٹرنیٹ سے تصاویر کا مکمل خاتمہ ممکن نہیں، مگر وہ چاہتی ہیں کہ آئندہ کے لیے ان کی نجی زندگی اور سابقہ شوبز کی شناخت کا احترام کیا جائے۔
Discussion about this post