عوام کے لیے ایک بڑی خوشخبری!
وزیراعظم کی ہدایت پر سوئی ناردرن گیس کمپنی (SNGPL) نے گھریلو گیس کنکشنز پر سے عرصہ دراز سے عائد پابندی ختم کر دی ہے، جب کہ ایل این جی کنکشنز کی باقاعدہ منظوری بھی دے دی گئی ہے۔اسلام آباد ریجنل آفس میں پریس کانفرنس کے دوران منیجنگ ڈائریکٹر ایس این جی پی ایل عامر طفیل نے بتایا کہ اس سال تین لاکھ نئے کنکشنز کا ہدف حاصل کیا جائے گا، اور اگلے سال سے ہر سال چھ لاکھ نئے گھریلو صارفین کو گیس کی فراہمی ممکن بنائی جائے گی۔ عامر طفیل کا کہنا تھا کہ ہیڈ آفس اور ریجنل سطح پر مانیٹرنگ یونٹس قائم کر دیے گئے ہیں تاکہ درخواستوں اور فراہمی کے عمل پر سخت نگرانی رکھی جا سکے۔ انہوں نے بتایا کہ دو لاکھ پینتالیس ہزار افراد کے ڈیمانڈ نوٹس پہلے ہی جمع ہو چکے ہیں، جنہیں اب باضابطہ خطوط جاری کر دیے گئے ہیں۔ایم ڈی کے مطابق، اب صارفین کو ایل پی جی سلنڈر خریدنے کی ضرورت نہیں پڑے گی، کیونکہ گیس براہِ راست گھروں تک پہنچائی جائے گی۔
ان کا کہنا تھا کہ "عوام کسی دلال یا ایجنٹ کے جھانسے میں نہ آئیں، بلکہ براہ راست آن لائن یا دفاتر میں آکر درخواست جمع کروائیں۔” انہوں نے مزید بتایا کہ ایل این جی، ایل پی جی کے مقابلے میں 30 فیصد سستی ہے، تاہم اس کی موجودہ قیمت بتیس سو روپے فی ایم ایم بی ٹو یو مقرر کی گئی ہے۔ عامر طفیل نے واضح کیا کہ حکومت کا مقصد عوام کو محفوظ، شفاف اور براہ راست توانائی کی فراہمی فراہم کرنا ہے، تاکہ لوگ مہنگے سلنڈرز کے بوجھ سے نجات پا سکیں اور گیس کی سہولت آسانی سے گھروں تک پہنچے۔
Discussion about this post