شاہین شاہ آفریدی کا نیا کمال

پاکستان کے اسٹار فاسٹ بولر شاہین شاہ آفریدی نے ایک اور شاندار سنگ میل عبور کر لیا ہے۔ ایشیا کپ 2025 کے سپر فور مرحلے میں بنگلہ دیش کے خلاف آل راؤنڈ کارکردگی دکھا کر وہ ٹی ٹوئنٹی انٹرنیشنل کرکٹ میں سب سے زیادہ پلیئر آف دی میچ ایوارڈز جیتنے والے پاکستانیوں کی فہرست میں بابر اعظم کو پیچھے چھوڑ گئے ہیں۔ بنگلہ دیش کے خلاف میچ میں شاہین نے بیٹنگ میں قیمتی 19 رنز جوڑے جبکہ گیند کے ساتھ صرف 17 رنز کے عوض 3 وکٹیں اڑائیں۔ ان کی اس پرفارمنس کی بدولت پاکستان نے 11 رنز سے کامیابی حاصل کی اور فائنل میں جگہ بنا لی۔یہ شاہین کے کیریئر کا دسواں پلیئر آف دی میچ ایوارڈ ہے، جس کے ساتھ وہ بابر اعظم (9 ایوارڈز) سے آگے نکل گئے ہیں۔

پاکستانی کھلاڑیوں کے سب سے زیادہ پلیئر آف دی میچ ایوارڈز

 محمد رضوان — 12
 شاداب خان — 12
 محمد حفیظ — 11
 شاہد آفریدی — 11
 شاہین شاہ آفریدی — 10
 بابر اعظم — 9
 عمر اکمل — 7
 شعیب ملک — 6

ماہرین کے مطابق شاہین آفریدی نہ صرف پاکستان کے بہترین بولر ہیں بلکہ اب ابھرتے ہوئے آل راؤنڈر کے طور پر بھی سامنے آ رہے ہیں۔ اگر ان کی یہ فارم برقرار رہی تو وہ جلد ہی رضوان اور شاداب خان کے ریکارڈ کو بھی خطرے میں ڈال سکتے ہیں۔

ایشیا کپ کا بڑا ٹکراؤ — پاکستان بمقابلہ بھارت

ایشیا کپ 2025 کا فائنل اب پاکستان اور بھارت کے درمیان ہوگا۔ تاریخ میں پہلی بار دونوں روایتی حریف ایشیا کپ کے فائنل میں آمنے سامنے آ رہے ہیں۔ بھارت اب تک ایونٹ میں ناقابلِ شکست ہے اور پاکستان کو پہلے ہی ہرا چکا ہے۔ تاہم شاہین شاہ آفریدی اور گرین شرٹس کی موجودہ فارم شائقین کو ایک سنسنی خیز اور یادگار مقابلے کی امید دلا رہی ہے۔