ٹرمپ، شبہاز ملاقات میں علاقائی سلامتی اور دہشتگردی سے نمٹنے کے تعاون پر گفتگو

پاکستان اور امریکا کے تعلقات کی تاریخ میں ایک اور یادگار باب رقم ہوگیا۔ وائٹ ہاؤس کے اوول آفس میں ہونے والی حالیہ ملاقات نے نہ صرف دونوں ممالک کے تعلقات کو نئی سمت دی بلکہ دنیا بھر کی نگاہیں بھی اپنی جانب مبذول کرلیں۔ امریکی صدر ڈونلڈ ٹرمپ نے وزیراعظم پاکستان شہباز شریف اور آرمی چیف فیلڈ مارشل عاصم منیر کا پرتپاک استقبال کیا۔ خوشگوار اور دوستانہ ماحول میں یہ ملاقات ایک گھنٹہ 20 منٹ تک جاری رہی، جس میں امریکی نائب صدر جے ڈی وینس اور وزیر خارجہ مارکو روبیو بھی شریک تھے۔ وزیراعظم آفس کے مطابق بات چیت میں علاقائی امن و سلامتی، انسدادِ دہشت گردی اور انٹیلی جنس کے شعبوں میں تعاون کو مزید وسعت دینے پر تفصیلی تبادلہ خیال کیا گیا۔

وزیراعظم شہباز شریف نے صدر ٹرمپ کا پاک–امریکا تجارتی معاہدے پر شکریہ ادا کرتے ہوئے انہیں دورۂ پاکستان کی  باضابطہ دعوت بھی دی۔ شہباز شریف نے زراعت، آئی ٹی، معدنیات اور توانائی کے شعبوں میں امریکی سرمایہ کاروں کے لیے پُرکشش مواقع پیش کیے اور امید ظاہر کی کہ صدر ٹرمپ کی قیادت میں دونوں ملکوں کے تعلقات مزید مضبوط اور دیرپا بنیادوں پر استوار ہوں گے۔

🚨 President Trump: “We have a great leader coming, we have the Prime Minister of Pakistan coming and the Field Marshal of Pakistan. Field Marshal is a very great guy and so is the Prime Minister, both. And they’re coming and they may be in this room right now.” pic.twitter.com/Kmc2rIY8Xc

— Murtaza Ali Shah (@MurtazaViews) September 25, 2025

اعلامیے کے مطابق وزیراعظم نے صدر ٹرمپ کی جرات مندانہ، فیصلہ کن اور بہادر قیادت کی تعریف کرتے ہوئے کہا کہ امریکی صدر دنیا بھر میں تنازعات کے خاتمے اور امن کے قیام کے لیے سنجیدہ و مخلصانہ کوششیں کر رہے ہیں۔ ان کی قیادت میں پاکستان اور بھارت کے درمیان جنگ بندی ممکن ہوئی جس سے خطے کو بڑے سانحے سے بچایا گیا۔

مزید برآں وزیراعظم نے دہشت گردی کے خلاف پاکستان کی قربانیوں کے اعتراف اور مشرقِ وسطیٰ، خصوصاً غزہ اور مغربی کنارے میں قیامِ امن کے لیے مسلم رہنماؤں کے ساتھ مشاورت پر بھی صدر ٹرمپ کو سراہا۔ یہ ملاقات نہ صرف پاک–امریکا تعلقات کے نئے دور کا آغاز ہے بلکہ خطے میں امن و استحکام کی ایک روشن اُمید بھی۔