نیویارک میں موسیقی کی سب سے بڑی تقریب ایم ٹی وی ویڈیو میوزک ایوارڈز 2025 کا انعقاد ہوا، جہاں دنیا بھر کے مقبول فنکاروں کو شاندار اعزازات سے نوازا گیا۔
اس موقع پر عالمی شہرت یافتہ گلوکارہ آریانا گرانڈے نے سب سے بڑا اعزاز سال کی بہترین ویڈیو کا ایوارڈ اپنے گانے “Brighter Days Ahead” پر حاصل کیا۔ اس سے قبل انہیں اسی گانے پر بہترین پاپ ویڈیو کا ایوارڈ بھی دیا گیا۔ ایوارڈ وصول کرتے ہوئے آریانا گرانڈے نے کہا کہ "بچپن سے ہی فن میرے لیے ایک محفوظ جگہ رہا ہے، میں شکر گزار ہوں کہ مجھے اس شعبے میں کام کرنے کا موقع ملا۔” انہوں نے اپنے والد کا خصوصی شکریہ ادا کیا جو پہلی بار اس میوزک ویڈیو میں بطور اداکار شامل ہوئے۔
تقریب میں لیڈی گاگا کو سال کی بہترین فنکارہ قرار دیا گیا۔ وہ ٹیلر سوئفٹ اور بیونسے جیسے بڑے ناموں کو پیچھے چھوڑنے میں کامیاب رہیں۔ لیڈی گاگا نے برونو مارس کے ساتھ اپنے مشہور گانے “Die with a Smile” پر بہترین تعاون کا ایوارڈ بھی حاصل کیا۔ اپنے خطاب میں انہوں نے کہا کہ "فنکار ہونا میرے لیے سب سے بڑا اعزاز ہے اور آج کی یہ کامیابی میرے لیے ناقابلِ بیان خوشی ہے۔”
امریکی گلوکارہ سبرینا کارپینٹر کو ان کے البم “Short n’ Sweet” کے لیے بہترین البم کا ایوارڈ دیا گیا۔ انہوں نے کہا کہ "یہ میرے لیے کسی تحفے سے کم نہیں کہ لوگ اپنی قیمتی زندگی سے وقت نکال کر میرا البم سنتے ہیں۔”
تقریب میں عالمی فنکاروں کو بھی سراہا گیا:
-
سال کا بہترین گانا “Opt” کو قرار دیا گیا جسے برونو مارس اور جنوبی کورین گلوکارہ روزے نے پیش کیا۔
-
بہترین کورین گانا کا ایوارڈ لیزا کو “Born Again” پر ملا۔
تقریب کا سب سے یادگار لمحہ اس وقت آیا جب عظیم گلوکارہ ماریا کیری کو ان کی شاندار خدمات پر لائف ٹائم اچیومنٹ ایوارڈ سے نوازا گیا۔ انہوں نے کہا کہ "میوزک ویڈیوز چھوٹی فلموں کی مانند ہوتی ہیں جو ایک خواب کو حقیقت میں بدل دیتی ہیں۔” یاد رہے کہ ایم ٹی وی ویڈیو میوزک ایوارڈز کا آغاز 1984 میں ہوا تھا اور یہ اعزازات مکمل طور پر مداحوں کے ووٹوں سے دیے جاتے ہیں۔
Discussion about this post