ڈسٹرکٹ اینڈ سیشنز عدالت نے سامعہ حجاب اغوا اور دھمکی کیس میں گرفتار مرکزی ملزم حسن زاہد کا جسمانی ریمانڈ مزید تین روز کے لیے منظور کر لیا۔ ملزم کو ابتدائی پانچ روزہ ریمانڈ مکمل ہونے پر ڈیوٹی مجسٹریٹ اظہر ندیم کے روبرو پیش کیا گیا۔ سماعت کے دوران ملزم کے وکیل نے مؤقف اپنایا کہ عدالت پہلے پچھلے ریمانڈ کا جائزہ لے اور پولیس سے دریافت کرے کہ اب تک کس حد تک تحقیقات مکمل ہوئی ہیں۔ عدالت میں ملزم حسن زاہد اور سوشل میڈیا انفلوئنسر سامعہ حجاب کے درمیان مالی لین دین کی تفصیلات پیش کی گئیں، جب کہ سامعہ کے والدین کا ویڈیو بیان بھی ریکارڈ کا حصہ بنایا گیا۔سماعت کے موقع پر سامعہ حجاب نے عدالت کو بتایا:
"اگر حسن جیل سے رہا ہوگیا تو وہ مجھ سے بدلہ ضرور لے گا۔”
ملزم کے وکیل نے مؤقف دیا کہ دونوں کی منگنی ہو چکی ہے اور اس حوالے سے منگنی کی تصاویر بھی عدالت میں پیش کیں۔ پراسیکیوٹر نے عدالت کو بتایا کہ ملزم کے قبضے سے 45 ہزار روپے برآمد ہو چکے ہیں، تاہم اس کی گاڑی، اسلحہ اور ساتھیوں کی برآمدگی ابھی باقی ہے۔ اسی بنا پر انہوں نے جسمانی ریمانڈ میں مزید آٹھ روز کی توسیع کی استدعا کی۔ عدالت نے تمام دلائل سننے کے بعد حسن زاہد کا جسمانی ریمانڈ مزید تین دن کے لیے بڑھا دیا۔
Discussion about this post