ایئر وائس مارشل شہریار خان نے کہا ہے کہ پاکستان کے دشمنوں کو ہمیشہ ناکامی اور ذلت کا سامنا کرنا پڑا، اور آئندہ بھی ان کا انجام شکست ہی ہوگا۔ انہوں نے دوٹوک الفاظ میں کہا: “اگلی بار اسکور 6-0 پر محدود نہیں رہے گا، بلکہ 60-0 ہوگا۔”
کراچی میں مزارِ قائد پر گارڈز کی تبدیلی کی پُروقار تقریب سے خطاب کرتے ہوئے ان کا کہنا تھا کہ مزارِ قائد پر گارڈز کے فرائض سنبھالنا پاکستان ایئر فورس اکیڈمی اصغر خان کے لیے ایک بڑا اعزاز ہے۔ ایئر وائس مارشل شہریار خان نے کہا کہ 6 ستمبر وہ دن ہے جو ہمیں یاد دلاتا ہے کہ کس طرح ہم نے دشمن کے ناپاک عزائم کو خاک میں ملایا۔ آج بھی پاک فضائیہ ہر محاذ پر پوری تیاری کے ساتھ کھڑی ہے۔ “ہم نے کبھی اپنی قوم کو مایوس نہیں کیا، اور ہمیں فخر ہے کہ جنگ کے دنوں کے ساتھ ساتھ امن کے وقت میں بھی پاک فضائیہ ہمیشہ پیش پیش رہی ہے۔”
انہوں نے آپریشن بنیان المرصوص کا حوالہ دیتے ہوئے کہا کہ اس نے 6 ستمبر کی یاد تازہ کر دی۔ ان کا کہنا تھا کہ پاکستانی فضاؤں کا دفاع پاک فضائیہ کے مضبوط اور فولادی ہاتھوں میں ہے۔ “تکنیکی جدت اور اعلیٰ تربیت نے دنیا کو تسلیم کرنے پر مجبور کر دیا کہ پاکستان ایئر فورس ایک ناقابلِ تسخیر قوت ہے۔”
انہوں نے تمام شہداء کو سلام پیش کرتے ہوئے کہا کہ پاک فضائیہ نے ہمیشہ قوم کی امیدوں پر پورا اترنے کا اعزاز حاصل کیا ہے۔یومِ دفاع و شہداء کے موقع پر آج دن کا آغاز وفاقی دارالحکومت اسلام آباد میں 31 توپوں اور صوبائی دارالحکومتوں میں 21 توپوں کی سلامی سے ہوا۔ ملک بھر کی مساجد میں نمازِ فجر کے بعد پاکستان کی سلامتی اور خوشحالی کے لیے خصوصی دعائیں کی گئیں۔ یاد رہے کہ رواں برس مئی میں ہونے والی حالیہ جنگ میں پاکستان کی مسلح افواج نے ایک بار پھر دشمن کے غرور کو خاک میں ملایا۔ پاک فضائیہ نے جدید ترین رافیل طیاروں سمیت کئی جنگی جہاز تباہ کیے اور دشمن کے ایئر فیلڈز کو نشانہ بنا کر دنیا کو دکھا دیا کہ پاکستان اپنے دفاع کی بھرپور صلاحیت رکھتا ہے۔
Discussion about this post