راولپنڈی کے نور خان ایئر بیس پر آج ایک اہم لمحہ دیکھنے میں آیا جب امریکی فوجی طیارہ سیلاب متاثرین کے لیے امدادی سامان لے کر پاکستان پہنچا۔ اس موقع پر پاک فوج کے افسران اور اسلام آباد میں امریکی ناظم الامور نیٹلی بیکر موجود تھیں۔امریکی سفارتخانے کے ترجمان کے مطابق نیٹلی بیکر نے سیلاب سے ہونے والے نقصانات پر گہرے دکھ اور افسوس کا اظہار کرتے ہوئے متاثرہ خاندانوں سے ہمدردی کی اور یقین دلایا کہ مشکل کی اس گھڑی میں امریکا پاکستان کے ساتھ کھڑا ہے۔
یاد رہے کہ حالیہ دنوں میں شدید بارشوں اور بھارت کے ڈیموں سے اچانک پانی کے اخراج کے باعث پنجاب کے کئی علاقے تباہ کن سیلاب کی لپیٹ میں آچکے ہیں۔ لاکھوں افراد متاثر ہوئے ہیں، ہزاروں گھر پانی میں ڈوب گئے ہیں، کھڑی فصلیں برباد ہوگئی ہیں اور لوگ اپنے پیارے گھروں کو چھوڑ کر عارضی کیمپوں میں پناہ لینے پر مجبور ہیں۔پاکستانی حکومت اپنی تمام تر توانائیاں متاثرین کی مدد کے لیے بروئے کار لا رہی ہے، مگر اس وقت ملک کو عالمی برادری کے تعاون کی بھی اشد ضرورت ہے۔ اقوام متحدہ اور برطانیہ کے بعد امریکا نے بھی انسانی ہمدردی کے تحت اپنی امداد پاکستان بھیج دی ہے۔
دوسری جانب سندھ حکومت کے مطابق پنجاب سے سندھ میں داخل ہونے والا سیلاب 16 لاکھ سے زائد افراد کو متاثر کر سکتا ہے۔ اگر اگلے مرحلے میں اونچے درجے کا سیلاب آ گیا تو تباہی کا دائرہ اور بھی وسیع ہو جائے گا، جس سے پاکستان کو نہ صرف انسانی المیے بلکہ شدید معاشی دباؤ کا سامنا بھی کرنا پڑ سکتا ہے۔
Discussion about this post