راس ٹیلر اب سموا کے لیے کھیلیں گے

نیوزی لینڈ کے مایہ ناز بیٹر اور کرکٹ لیجنڈ راس ٹیلر ایک بار پھر انٹرنیشنل کرکٹ میں جلوہ گر ہوں گے۔ تاہم اس بار وہ کیوی جرسی میں نہیں بلکہ اپنی والدہ کے آبائی وطن سموا کی نمائندگی کرتے نظر آئیں گے۔ٹیلر نے اعلان کیا ہے کہ وہ رواں ماہ عمان میں ہونے والے ایشیا-ایسٹ ایشیا-پیسیفک ٹی ٹوئنٹی ورلڈکپ 2026 کوالیفائر میں سموا کی جانب سے ایکشن میں ہوں گے۔ اس ٹورنامنٹ میں سموا کو عمان اور پاپوا نیو گنی جیسی مضبوط ٹیموں کا سامنا ہوگا۔ آئی سی سی قوانین کے تحت، اپریل 2022 میں نیوزی لینڈ کے لیے اپنا آخری میچ کھیلنے کے تین سال بعد اب وہ اپنی دوسری قومی ٹیم کے لیے کھیلنے کے اہل ہوگئے ہیں۔ راس ٹیلر کے پاس اپنی والدہ کی وجہ سے سموا کی شہریت بھی موجود ہے۔ اس موقع پر ٹیلر نے اپنے جذبات کا اظہار کرتے ہوئے کہا:

"یہ میرے لیے بڑے فخر کی بات ہے کہ میں اپنے ورثے، اپنی ثقافت، اپنے گاؤں اور اپنے خاندان کی نمائندگی کر رہا ہوں۔ میری یہ واپسی اس بات کا ثبوت ہے کہ کرکٹ سے میری محبت آج بھی اسی طرح قائم ہے جیسے پہلے دن تھی۔”

Ross Taylor will be back, in new colours!

Samoa have announced a squad which includes the former New Zealand international for the T20 World Cup Asia-EAP qualifier 🇼🇸 pic.twitter.com/C8kALLqnhQ

— ESPNcricinfo (@ESPNcricinfo) September 5, 2025

یاد رہے کہ راس ٹیلر کا شمار نیوزی لینڈ کے کامیاب ترین بیٹرز میں ہوتا ہے۔ وہ 112 ٹیسٹ، 236 ون ڈے اور 102 ٹی ٹوئنٹی میچز کھیل چکے ہیں۔ انٹرنیشنل کیریئر میں انہوں نے 18 ہزار سے زائد رنز بنائے جبکہ ٹی ٹوئنٹی انٹرنیشنلز میں ان کا اسٹرائیک ریٹ 122.37 اور مجموعی اسکور 1909 رنز ہے۔ ان کی قیادت اور شاندار بیٹنگ کے دم پر نیوزی لینڈ نے پہلی بار آئی سی سی ورلڈ ٹیسٹ چیمپئن شپ بھی اپنے نام کی تھی۔ اب تین سال بعد کرکٹ کے میدان میں راس ٹیلر کی شاندار واپسی صرف سموا کے لیے ہی نہیں بلکہ دنیا بھر کے کرکٹ شائقین کے لیے بھی ایک نئی خوشخبری ہے۔