کراچی سمیت سندھ میں نشیبی علاقے زیر آب آنے کا خدشہ

محکمہ موسمیات نے مون سون کے نویں اسپیل کے دوران ملک کے بیشتر علاقوں میں 7 سے 10 ستمبر تک موسلادھار بارشوں کی پیش گوئی کی ہے۔ اس دوران کراچی سمیت سندھ کے کئی شہروں میں شدید بارش کا امکان ہے، جس کے باعث نشیبی علاقے زیرِ آب آسکتے ہیں۔ ڈائریکٹر نیشنل فارکاسٹنگ سینٹر اسلام آباد عرفان ورک نے بتایا کہ سندھ اور بلوچستان کے مختلف علاقوں میں بھی 7 سے 10 ستمبر کے دوران موسلادھار بارشوں کا سلسلہ متوقع ہے۔ میٹ آفس کے مطابق مون سون ہوائیں 6 ستمبر کی شام پنجاب اور سندھ میں داخل ہوں گی، جبکہ کشمیر کے بیشتر اضلاع میں 6 سے 8 ستمبر تک بارشیں برسنے کا امکان ہے۔ اسی دوران بلوچستان میں 7 سے 9 ستمبر تک بارشوں کی پیش گوئی کی گئی ہے۔ خیبر پختونخوا کے بالائی اضلاع میں بھی 7 سے 9 ستمبر کے دوران شدید بارشیں متوقع ہیں۔ دوسری جانب کشمیر، مری، گلیات اور گلگت بلتستان میں 7 سے 8 ستمبر کے دوران لینڈ سلائیڈنگ کے خدشات ظاہر کیے گئے ہیں۔ محکمہ موسمیات نے مون سون کے نویں اسپیل کے پیشِ نظر تمام متعلقہ اداروں کو ہائی الرٹ رہنے کی ہدایت کردی ہے تاکہ ممکنہ ہنگامی صورتحال سے نمٹا جا سکے۔