وزیراعظم نے موسمیاتی تبدیلی کے اثرات سے نمٹنے کے لیے اعلیٰ سطح کا اجلاس بلانے کا فیصلہ کیا ہے۔ وزیراعظم آفس سے جاری اعلامیے کے مطابق اجلاس میں چاروں صوبوں کے وزرائے اعلیٰ، وزیراعظم آزاد کشمیر، وزیراعلیٰ گلگت بلتستان اور متعلقہ اداروں کے سربراہان شریک ہوں گے۔ اعلامیے میں کہا گیا ہے کہ موسمیاتی تبدیلی سے نمٹنے کے لیے مؤثر پالیسی پر کام جاری ہے، جس کا ورکنگ پیپر تمام صوبائی حکومتوں کے ساتھ شیئر کیا جائے گا۔ اس موقع پر وفاقی وزیر مصدق ملک نے کہا کہ وفاقی حکومت اور صوبوں کے درمیان ابھی بھی شک کی فضا موجود ہے، تاہم مشاورتی عمل کے ذریعے اعتماد کی فضا قائم کرنے کی کوشش کی جائے گی۔ اعلامیے کے مطابق وزیراعظم نے ہنگامی صورتحال سے نکلتے ہی یہ اجلاس بلانے کا فیصلہ کیا ہے تاکہ ایک جامع حکمت عملی ترتیب دی جا سکے۔
Discussion about this post