بنوں : دہشت گردوں کی فائرنگ، ایلیٹ فورس کا کمانڈو شہید

خیبر پختونخوا کے ضلع بنوں کے تھانہ کینٹ کی حدود میں دہشت گردوں کی فائرنگ سے ایلیٹ فورس کا کمانڈو شہید ہوگیا۔ پولیس کے مطابق میرانشاہ روڈ پر گل زمان مسجد کے قریب نامعلوم موٹر سائیکل سواروں نے ڈیوٹی ختم کرکے واپس گاؤں جانے والے ایلیٹ فورس کے کمانڈو، کانسٹیبل شاہ ریاض پر فائرنگ کی اور فرار ہوگئے۔ فائرنگ کے نتیجے میں کانسٹیبل شاہ ریاض موقع پر ہی شہید ہوگئے۔واقعے کے بعد پولیس نے علاقے میں سرچ آپریشن شروع کردیا تاہم کوئی گرفتاری عمل میں نہیں آسکی۔ یاد رہے کہ چند روز قبل بھی بنوں کے تھانہ ہوید میں تعینات پولیس اہلکار رافید دہشت گردوں کی فائرنگ سے شہید ہوگئے تھے جبکہ کانسٹیبل جاوید کے بیٹے کو اغوا کیا گیا تھا۔ پولیس حکام کا کہنا ہے کہ دہشت گردوں کے خلاف کارروائیاں جاری ہیں، اب تک متعدد دہشت گرد مارے جا چکے ہیں جبکہ ان کے سہولتکاروں کے گھروں کو مسمار کرنے کا عمل بھی جاری ہے۔ ادھر گزشتہ رات ڈومیل پولیس اسٹیشن پر دستی بم سے حملہ کیا گیا تاہم خوش قسمتی سے کوئی جانی نقصان نہیں ہوا۔

باجوڑ میں مارٹر حملہ، ایک شخص جاں بحق

دوسری جانب ضلع باجوڑ کی تحصیل مامونڈ میں ایک گھر پر مارٹر گولہ گرنے سے ایک شخص جاں بحق اور اس کا بھائی زخمی ہوگیا۔ متوفی کی شناخت یعقوب ولد محمدان جبکہ زخمی کی شناخت غنی کے نام سے ہوئی ہے۔ زخمی کو فوری طور پر ڈی ایچ کیو ہسپتال منتقل کردیا گیا۔