پاکستان میں گوگل نے اپنا جدید ترین AI موڈ سرچ فیچر لانچ کر دیا ہے، جو صارفین کو پیچیدہ سوالات کے نہایت تیز، درست اور جامع جوابات فراہم کرنے کی صلاحیت رکھتا ہے۔
یہ فیچر گوگل کے Gemini 2.5 کے کسٹم ورژن سے چلتا ہے، جو صارفین کو لمبے اور تفصیلی سوالات کرنے اور ان کے جامع جوابات حاصل کرنے کا موقع دیتا ہے , وہ سوالات جن کے لیے ماضی میں متعدد سرچز درکار ہوتی تھیں۔
ایک سرچ میں کئی سوالات کے جوابات
اب صارفین ایک ہی وقت میں مختلف سوالات کر سکتے ہیں اور بھرپور تفصیل کے ساتھ جوابات حاصل کر سکتے ہیں۔ یہ سہولت بالخصوص منصوبہ بندی، تحقیق اور سیکھنے کے عمل کو بے حد آسان بناتی ہے۔
-
مثال کے طور پر کوئی صارف پوچھ سکتا ہے:
"میں اکتوبر میں ہنزہ کا سفر پلان کر رہا ہوں، پانچ دن کا ایسا شیڈول بتائیں جس میں سیاحت، ایڈونچر اور مقامی کھانے شامل ہوں۔” -
یا پھر کوئی والدین سرچ کر سکتے ہیں:
"میرا بچہ نویں جماعت میں ہے اور ریاضی میں مشکل کا سامنا کر رہا ہے، کیا پاکستان میں فری آن لائن ذرائع موجود ہیں جو الجبرا اور جیومیٹری سیکھنے میں مدد کریں؟”
صرف ٹیکسٹ نہیں ، تصویر اور وائس سے بھی سرچ
گوگل کا کہنا ہے کہ اب صارفین صرف ٹیکسٹ ہی نہیں بلکہ تصویر یا وائس کمانڈ کے ذریعے بھی سرچ کر سکیں گے۔مثال کے طور پر کوئی خریدار کراچی کی مارکیٹ میں اجنبی مصالحے کی تصویر اپ لوڈ کرکے پوچھ سکتا ہے:
"یہ مصالحے کون سے ہیں اور انہیں پاکستانی پکوان میں کیسے استعمال کیا جا سکتا ہے؟”
بہتر، مگر محتاط سرچ
گوگل کے مطابق، AI موڈ صارفین کو ویب پر موجود بہترین مواد تک رسائی فراہم کرے گا اور مختلف فارمیٹس میں معلومات پیش کرے گا۔ البتہ جہاں زیادہ اعتماد کے ساتھ AI جواب دینا ممکن نہ ہوگا، وہاں صارفین کو روایتی سرچ رزلٹس ہی دکھائے جائیں گے۔
پاکستان میں فیچر فعال
یہ فیچر اب پاکستان میں گوگل ایپ (اینڈرائیڈ اور آئی او ایس) کے ساتھ ساتھ موبائل اور ڈیسک ٹاپ ویب پر بھی فعال کر دیا گیا ہے۔
Discussion about this post