سیلابی صورتحال: وزیراعظم کا بلاول بھٹو، خالد مقبول اور حافظ نعیم الرحمٰن سے رابطہ

وزیراعظم شہباز شریف نے مون سون بارشوں اور سیلابی صورتحال کے پیشِ نظر قومی قیادت سے براہِ راست رابطے شروع کر دیے۔ وزیراعظم آفس کے مطابق شہباز شریف نے چیئرمین پیپلز پارٹی بلاول بھٹو زرداری، ایم کیو ایم پاکستان کے کنوینر خالد مقبول صدیقی اور امیر جماعت اسلامی حافظ نعیم الرحمٰن سے ٹیلی فونک گفتگو کی۔

وزیراعظم نے بلاول بھٹو زرداری کو یقین دلایا کہ وفاقی حکومت سندھ میں بارش اور سیلابی ہنگامی صورتحال سے نمٹنے کے لیے ہر ممکن تعاون کرے گی۔ اس موقع پر وزیراعظم نے چیئرمین این ڈی ایم اے کو ہدایت دی کہ سندھ حکومت کے ساتھ مکمل رابطے میں رہتے ہوئے پی ڈی ایم اے کو تمام ضروری معاونت فراہم کی جائے اور شہریوں کو ممکنہ خطرات سے بروقت آگاہ کیا جائے۔ خالد مقبول صدیقی سے گفتگو میں وزیراعظم نے کہا کہ سندھ میں بارشوں اور سیلابی خطرات کا سامنا کرنے کے لیے وفاقی حکومت بھرپور تعاون فراہم کرے گی۔

دوسری جانب وزیراعظم نے امیر جماعت اسلامی حافظ نعیم الرحمٰن سے بھی ٹیلی فونک گفتگو کی۔ اس دوران خیبرپختونخوا میں بارشوں اور سیلاب سے ہونے والے نقصانات اور امدادی سرگرمیوں پر تبادلہ خیال کیا گیا۔ وزیراعظم نے الخدمت فاؤنڈیشن کی ریسکیو اور امدادی کارروائیوں کو سراہتے ہوئے کہا کہ عوام کی خدمت کے لیے ایسی کوششیں قابلِ تحسین ہیں۔