سپریم کورٹ کے بانی پی ٹی آئی کی ضمانت کی درخواستوں پر پنجاب حکومت کو نوٹس

سپریم کورٹ میں چیف جسٹس آف پاکستان یحییٰ آفریدی نے لاہور ہائی کورٹ کی جانب سے بانی پی ٹی آئی کی 9 مئی کے 8 مقدمات میں ضمانت مسترد کرنے کے فیصلے میں دی گئی بعض آبزرویشنز پر سوال اٹھا دیے۔ چیف جسٹس یحییٰ آفریدی کی سربراہی میں جسٹس محمد شفیع صدیقی اور میاں گل حسن اورنگزیب پر مشتمل تین رکنی بینچ نے سماعت کی۔ بانی پی ٹی آئی کے وکیل بیرسٹر سلمان صفدر اور پنجاب کے اسپیشل پراسیکیوٹر ذوالفقار نقوی عدالت میں پیش ہوئے۔ سماعت کے دوران چیف جسٹس نے استفسار کیا کہ کیا ضمانت کے کیس میں حتمی نوعیت کی آبزرویشنز دی جا سکتی ہیں؟ انہوں نے کہا کہ فی الحال عدالت قانونی نکات میں نہیں جائے گی کیونکہ ایسے نتائج دینے سے کسی ایک فریق کے کیس پر اثر پڑ سکتا ہے۔ عدالت نے فریقین کے وکلا کو ہدایت کی کہ اگلی سماعت تک قانونی سوالات پر تیاری مکمل کریں۔ سلمان صفدر کی روسٹرم پر بات کرنے کی استدعا چیف جسٹس نے مسترد کر دی، اور پنجاب حکومت کو نوٹس جاری کرتے ہوئے سماعت 19 اگست تک ملتوی کر دی گئی۔

پس منظر اور بانی پی ٹی آئی کا مؤقف
سپریم کورٹ کا یہ اقدام اس وقت سامنے آیا جب 29 جون کو دو رکنی بینچ نے بانی پی ٹی آئی کی ضمانت کی درخواستوں پر سماعت وکیل کی عدم حاضری کے باعث ملتوی کر دی تھی۔اپیل میں مؤقف اختیار کیا گیا کہ 9 مئی کے مبینہ تشدد کی سازش میں ملوث ہونے کا الزام بے بنیاد ہے کیونکہ اس وقت وہ نیب کی حراست میں تھے، لہٰذا واقعات میں شامل ہونا "ناممکن” تھا۔ اپیل میں کہا گیا کہ لاہور ہائی کورٹ نے "انجینئرڈ اور جعلی شواہد” پر انحصار کیا، جن میں پولیس افسران کے پرانے اور تاخیر سے دیے گئے بیانات شامل ہیں۔

لاہور ہائی کورٹ کا مؤقف
لاہور ہائی کورٹ کے جسٹس سید شہباز علی رضوی اور جسٹس طارق محمود باجوہ پر مشتمل دو رکنی بینچ نے اپنے فیصلے میں مشاہدہ کیا تھا کہ استغاثہ کے پاس شواہد موجود ہیں جو بانی پی ٹی آئی کے کردار کو ظاہر کرتے ہیں۔ عدالت کے مطابق، یہ کردار ان کی گرفتاری کے بعد شروع ہوا اور اس میں فوجی تنصیبات پر حملے کی مبینہ ہدایات شامل ہیں۔فیصلے میں 2 پولیس افسران اور دیگر گواہوں کے بیانات کا حوالہ دیا گیا جنہوں نے دعویٰ کیا کہ انہوں نے خفیہ طور پر پی ٹی آئی اجلاسوں میں شرکت کی۔ ان اجلاسوں میں مبینہ طور پر بانی پی ٹی آئی نے دیگر رہنماؤں کو ہدایت دی کہ اگر انہیں اسلام آباد ہائی کورٹ سے گرفتار کیا جائے تو فوجی تنصیبات کو نشانہ بنایا جائے۔ یہ اجلاس مبینہ طور پر 4 مئی کو چکری، راولپنڈی کے ایک ریسٹ ایریا میں اور 7 تا 9 مئی 2023 کو زمان پارک لاہور میں منعقد ہوئے۔