معرکہ حق کے بعد پھیلائی گئی سیاسی افواہوں کو دو ٹوک الفاظ میں مسترد کرتے ہوئے پاک فوج کے ترجمان، ڈی جی آئی ایس پی آر لیفٹیننٹ جنرل احمد شریف چوہدری نے اعلان کیا کہ فیلڈ مارشل سید عاصم منیر کے صدرِ پاکستان بننے کی خبریں محض مفروضوں پر مبنی ہیں اور ان میں کوئی حقیقت نہیں۔ برطانوی جریدے دی اکانومسٹ کو خصوصی انٹرویو میں ڈی جی آئی ایس پی آر نے کہا:
"معرکہ حق کے بعد جن سیاسی قیاس آرائیوں کو ہوا دی جا رہی ہے، وہ مکمل طور پر بے بنیاد اور گمراہ کن ہیں۔ فیلڈ مارشل سید عاصم منیر کے بارے میں صدر بننے کی باتیں حقیقت سے کوسوں دور ہیں۔”
انٹرویو کے دوران جب بھارتی وزیر اعظم نریندر مودی کے اس بیان کا حوالہ دیا گیا کہ "بھارت دہشت گرد حملوں کا جواب فوجی کارروائی سے دے گا”، تو ڈی جی آئی ایس پی آر نے نہایت سخت لہجے میں خبردار کرتے ہوئے کہا:
"اگر بھارت نے اس سمت میں قدم بڑھایا تو یاد رکھے، اس بار شروعات مشرق سے ہوگی اور آغاز بھارت کے اندر گہرائی میں نشانہ بنا کر کیا جائے گا۔ بھارت کو یہ بات ذہن نشین کر لینی چاہیے کہ وہ بھی ہر جگہ مارے جا سکتے ہیں۔”
انہوں نے مزید کہا کہ پاکستان کی افواج کسی بھی جارحیت کا جواب دینے کی بھرپور صلاحیت رکھتی ہیں اور دفاعِ وطن کے لیے اٹھایا جانے والا ہر قدم فیصلہ کن اور کاری ضرب ہوگا۔
Discussion about this post