ترکیہ کے معروف اداکار بُراق اوزچیویت نے تاریخی ڈرامہ سیریز ’کورلش عثمان‘ چھوڑنے کا اعلان کر دیا ہے۔ اداکار پانچ سیزنز سے اس سیریز میں مرکزی کردار ’عثمان بے‘ ادا کر رہے تھے۔ترک میڈیا کے مطابق، بُراق اوزچیویت اور ڈرامے کے پروڈیوسر مہمت بوزداغ کے درمیان نئے سیزن کے معاوضے پر اختلافات پیدا ہوئے۔ اداکار نے فی قسط 40 لاکھ ترک لیرا کا مطالبہ کیا، جس پر پروڈکشن ٹیم نے تحفظات کا اظہار کیا۔ اس اختلاف کے بعد دونوں فریقین نے ایک دوسرے کو سوشل میڈیا پر اَن فالو بھی کر دیا۔ بُراق اوزچیویت نے حال ہی میں ایک انسٹاگرام اسٹوری کے ذریعے مداحوں سے رخصتی کا اعلان کیا اور لکھا: "الوداع کہنا ایک خوبی ہے، چھ سالہ سفر کے بعد اب وقت ہے آگے بڑھنے کا۔” ’کورلش عثمان‘ کا نیا سیزن اب عثمان کے بیٹے اورحان غازی کے گرد گھومے گا۔ نئے مرکزی کردار کے لیے مرت یازجی اوغلو، مراد یلدرم اور ابراہیم چیلیک کول جیسے اداکاروں کے نام زیر غور ہیں۔ واضح رہے کہ بُراق اوزچیویت ترکیہ کے سب سے زیادہ معاوضہ لینے والے اداکاروں میں شمار ہوتے ہیں، اور ان کی رخصتی کو سیریز کے لیے ایک بڑے موڑ کے طور پر دیکھا جا رہا ہے۔
Discussion about this post