امریکا نے پہلگام مبینہ حملے کی ذمہ داری قبول کرنے والے گروہ کو غیر ملکی دہشتگرد تنظیم (FTO) اور خصوصی طور پر نامزد عالمی دہشتگرد (SDGT) قرار دے دیا ہے۔ امریکی محکمہ خارجہ کے مطابق یہ اقدام صدر ڈونلڈ ٹرمپ کی حکومت کی دہشتگردی کے خلاف پالیسیوں، قومی سلامتی کے تحفظ اور حملے میں ہلاک ہونے والوں کے لیے انصاف کے مطالبے کی عکاسی کرتا ہے۔22 اپریل کو بھارت کے زیرِ قبضہ کشمیر کے علاقے وادی بائسارن، پہلگام میں ہونے والے حملے میں 26 افراد ہلاک ہوئے تھے۔ بھارت نے اس حملے کا الزام بغیر کسی ثبوت کے پاکستان پر عائد کیا اور اسی بنیاد پر پاکستان کے خلاف عسکری کارروائی کی۔ ابتدائی طور پر ایک کم معروف گروہ نے حملے کی ذمہ داری قبول کی، تاہم بعد میں اس سے لا تعلقی کا اظہار کر دیا گیا۔ امریکی فیصلے پر ردعمل میں سابق وزیر خارجہ بلاول بھٹو زرداری نے بھارتی صحافی کرن تھاپر کو ایک انٹرویو میں کہا تھا کہ پاکستان دہشتگردی کے خلاف بھارت سے تعاون کے لیے تیار ہے۔ انٹرویو میں کرن تھاپر نے یہ بھی دعویٰ کیا کہ بھارت نے اقوام متحدہ میں اس گروہ کو عالمی دہشتگرد قرار دینے کی کوشش کی، لیکن چین نے پاکستان کی حمایت کرتے ہوئے اس اقدام کو روک دیا۔
Discussion about this post