برطانیہ میں رائل انٹرنیشنل ایئر ٹیٹو شو میں پاک فضائیہ کی بھی شرکت

پاک فضائیہ کے جانباز شاہین ایک بار پھر عالمی افق پر اپن.ے پر پھیلانے کو تیار ہیں۔ رائل انٹرنیشنل ایئر ٹیٹو، جو دنیا کا سب سے بڑا ملٹری ایئر شو تصور کیا جاتا ہے، اس سال بھی برطانیہ میں سج گیا ہے اور اس بار پاکستان ایئر فورس کی شرکت خصوصی توجہ کا مرکز بن چکی ہے۔

جے ایف 17 تھنڈر کی گرجتی پرواز

پاکستان کے جدید ترین لڑاکا طیارے جے ایف 17 تھنڈر بلاک 3 کی پرواز کے دوران فضا میں ایندھن بھرنے کا شاندار مظاہرہ پیش کیا گیا۔ آئی ایس پی آر کے مطابق دورانِ پرواز ایندھن کی فراہمی کا یہ پیچیدہ آپریشن پاک فضائیہ کی طویل فاصلے تک مؤثر رسائی اور ہمہ وقت جنگی تیاریوں کا ثبوت ہے۔ یہ مظاہرہ نہ صرف تکنیکی مہارت بلکہ عملے کی ہم آہنگی، پیشہ ورانہ تربیت اور عالمی معیار کی علامت ہے۔

بین الاقوامی سطح پر توجہ کا مرکز

پلوامہ کے بعد حالیہ پاک بھارت کشیدگی میں مؤثر کردار ادا کرنے کے بعد جے ایف 17 طیارے بین الاقوامی دفاعی تجزیہ کاروں، ہوابازی کے ماہرین اور شائقین کے لیے دلچسپی کا موضوع بن چکے ہیں۔
جے ایف 17 بلاک 3 طیارے 4.5 جنریشن کی ٹیکنالوجی، جدید ریڈار سسٹم اور بی وی آر (Beyond Visual Range) میزائلوں سے لیس ہیں، جو کسی بھی جدید فضائی خطرے سے نمٹنے کی بھرپور صلاحیت رکھتے ہیں۔

سی 130 کی فنکارانہ جلوہ گری

اس سال کے ایئر شو کی تھیم "Eyes in the Sky” کے تحت پاکستان ایئر فورس نے سی 130 ہرکولیس طیارے کو خصوصی آرٹسٹک لایوری میں پیش کیا۔
نہ صرف عسکری طاقت بلکہ ہوابازی میں جمالیاتی اظہار اور تخلیقی ثقافت کا امتزاج، یہ طیارہ ایئر شو میں پاکستان کی منفرد شناخت کے طور پر سامنے آیا۔

پاکستان کا عالمی پیغام: امن، مہارت، وقار

آئی ایس پی آر کے مطابق پاکستان ایئر فورس کی اس شاندار شرکت کا مقصد صرف طاقت کا مظاہرہ نہیں بلکہ عالمی سطح پر امن، تعاون اور تکنیکی ترقی کا پیغام دینا ہے۔یہ شرکت اس بات کی علامت ہے کہ پاکستان ایک پروفیشنل، تربیت یافتہ اور جدید فضائی طاقت کے طور پر عالمی منظرنامے میں مقام رکھتا ہے۔