اسلام آباد کی عدالت کا 27 یوٹیوب چینلز بلاک کرنے کا حکم

وفاقی دارالحکومت کی مقامی عدالت نے ریاست مخالف مواد کے الزام میں 27 یوٹیوب چینلز کو فوری طور پر بلاک کرنے کا حکم دے دیا۔ یہ فیصلہ جوڈیشل مجسٹریٹ عباس شاہ نے وفاقی تحقیقاتی ادارے (ایف آئی اے) کی درخواست پر دیا۔ عدالتی حکم نامے کے مطابق، ایف آئی اے نے 2 جون کو مذکورہ یوٹیوب چینلز کے خلاف ریاست مخالف مواد سے متعلق باقاعدہ انکوائری کا آغاز کیا تھا۔ ایف آئی اے نے عدالت کو بتایا کہ ان چینلز پر ایسے بیانات اور ویڈیوز اپ لوڈ کی گئی ہیں جو ریاستی اداروں کے خلاف نفرت انگیز اور اشتعال انگیز مواد پر مشتمل ہیں۔ عدالت نے اپنے دو صفحات پر مشتمل تحریری حکم نامے میں قرار دیا کہ ایف آئی اے کی جانب سے پیش کردہ شواہد تسلی بخش ہیں اور قانون کے مطابق ان یوٹیوب چینلز کے خلاف کارروائی کی جا سکتی ہے۔عدالت نے یوٹیوب کے انچارج افسر کو ہدایت جاری کی کہ وہ ان 27 یوٹیوب چینلز کو فوری طور پر بلاک کرنے کے اقدامات کریں۔