سوشل میڈیا پر اشتعال انگیزی پر 74 افراد گرفتار کیے گئے، محکمہ داخلہ پنجاب

محکمہ داخلہ پنجاب کے سائبر پٹرولنگ سیل نے سوشل میڈیا پر اشتعال انگیز مواد کی مانیٹرنگ کے دوران 932 لنکس پاکستان ٹیلی کمیونیکیشن اتھارٹی (پی ٹی اے) کو رپورٹ کر دیے۔ ترجمان کے مطابق، اب تک صوبے بھر میں نفرت انگیز پوسٹس پر 74 افراد کو گرفتار کیا جا چکا ہے۔ ترجمان کا کہنا ہے کہ فرقہ وارانہ مواد کے خلاف زیرو ٹالرینس پالیسی اپنائی گئی ہے، اور محکمہ داخلہ، پولیس، ڈی جی پی آر اور پی آئی ٹی بی کی ٹیمیں اس پر مسلسل نظر رکھے ہوئے ہیں۔ سائبر پٹرولنگ اینڈ کوئیک رسپانس سیل سپیشل برانچ سے مستقل رابطے میں ہے تاکہ فوری کارروائی یقینی بنائی جا سکے۔ شہریوں سے اپیل کی گئی ہے کہ وہ سوشل میڈیا پر ذمہ داری کا مظاہرہ کریں اور نفرت انگیز یا اشتعال انگیز مواد سے گریز کریں۔ حکومت پنجاب نے یوم عاشور تک سوشل میڈیا پر نفرت انگیزی کے خلاف کریک ڈاؤن اور سیکیورٹی کے سخت اقدامات کا حکم دے رکھا ہے، جن میں فوج کی تعیناتی بھی شامل ہے۔