پاکستان کرکٹ بورڈ نے سابق ٹیسٹ آل راؤنڈر اظہر محمود کو قومی کرکٹ ٹیم کا قائم مقام ریڈ بال ہیڈ کوچ مقرر کر دیا ہے۔ وہ یہ ذمہ داری اپنے موجودہ معاہدے کی مدت تک ادا کریں گے، جو اپریل 2026 تک جاری ہے۔ اس دوران پاکستان ٹیم دو ٹیسٹ سیریز میں شرکت کرے گی۔ اظہر محمود اس سے قبل قومی ٹیم کے اسسٹنٹ ہیڈ کوچ کے طور پر خدمات انجام دے چکے ہیں اور طویل عرصے سے ٹیم کی اسٹریٹجک منصوبہ بندی کا اہم حصہ رہے ہیں۔ تاہم مائیک ہیسن کی بطور ہیڈ کوچ تقرری کے بعد وہ ٹیم مینجمنٹ سے الگ ہو گئے تھے۔ اب ایک بار پھر انہیں اہم کردار سونپا گیا ہے۔ اظہر محمود کو قومی ٹیم کے کوچنگ اسٹاف میں ایک مستند اور تجربہ کار شخصیت سمجھا جاتا ہے، جو کھلاڑیوں کے ساتھ قریبی تعلق اور جدید کوچنگ انداز رکھنے کی وجہ سے جانے جاتے ہیں۔ پی سی بی کو توقع ہے کہ ان کی قیادت میں ریڈ بال ٹیم مستحکم کارکردگی کا مظاہرہ کرے گی۔ اظہر محمود کی یہ تقرری فی الوقت عبوری حیثیت رکھتی ہے، لیکن اگر ان کی کوچنگ میں ٹیم نے مثبت نتائج دیے تو یہ مستقبل میں مستقل تقرری کی راہ بھی ہموار کر سکتی ہے۔
Discussion about this post