پاکستان اسٹاک مارکیٹ نے تاریخ رقم کر دی

 پاکستان اسٹاک مارکیٹ میں کاروباری ہفتے کے تیسرے روز زبردست تیزی دیکھنے میں آئی، جہاں 100 انڈیکس نے تمام ریکارڈز توڑتے ہوئے نئی بلندی حاصل کر لی۔ مارکیٹ کا آغاز 503 پوائنٹس کے اضافے کے ساتھ 120,954 پوائنٹس پر ہوا، اور دیکھتے ہی دیکھتے انڈیکس 121,279 پوائنٹس کی ریکارڈ سطح پر پہنچ گیا۔ گزشتہ روز مارکیٹ 120,450 پوائنٹس پر بند ہوئی تھی جبکہ آج کے دوران 1684 پوائنٹس کا تاریخی اضافہ ریکارڈ کیا گیا۔

اس کامیابی کی وجوہات کیا ہیں؟
اس حوالے سے ماہر اسٹاک مارکیٹ شہریار بٹ کا کہنا ہے کہ یہ تیزی پاکستان کی مسلسل بہتر ہوتی معاشی پالیسیوں کا نتیجہ ہے۔ ان کا کہنا تھا کہ آج نیشنل اکنامک کونسل کا اہم اجلاس متوقع ہے جس میں مائکرو اکنامک فریم ورک کی منظوری دیے جانے کا امکان ہے، اور یہی مارکیٹ پر مثبت اثر ڈال رہا ہے۔

 شہریار بٹ نے بتایا کہ:

• سیمنٹ سیکٹر میں نمایاں بہتری دیکھی جا رہی ہے۔

• معاشی اعشاریے بہتری کی جانب گامزن ہیں۔

• عالمی مالیاتی ادارے پاکستان کے ساتھ تعاون کے لیے تیار ہیں۔

• نشاط ملز ای وی گاڑیوں کی تیاری میں قدم رکھ چکی ہے، اور جلد نئی گاڑی لانچ کرنے جا رہی ہے۔

 پاکستان اسٹاک مارکیٹ میں سرمایہ کاروں کے اعتماد اور بجٹ سے وابستہ مثبت توقعات نے مارکیٹ کو نئی اڑان دے دی ہے، اور معیشت کی سمت درست ہوتی دکھائی دے رہی ہے۔ یہ پیش رفت نہ صرف معیشت کی مضبوطی کی دلیل ہے بلکہ سرمایہ کاروں کے روشن مستقبل کی نوید بھی!