آسٹریلیا پھر پاکستان آنے کو تیار

کرکٹ آسٹریلیا کے چیف ایگزیکٹو آفیسر ٹوڈ گرین برگ نے تصدیق کی ہے کہ آسٹریلوی کرکٹ ٹیم آئندہ برس کے اوائل میں وائٹ بال سیریز کے لیے پاکستان کا دورہ کرے گی۔ ان کا کہنا ہے کہ یہ دورہ ایک بار پھر پاکستان کے لیے ایک کامیاب کرکٹ سیریز ثابت ہوگا۔ آسٹریلوی سی ای او نے آن لائن پریس کانفرنس میں کہا کہ پاکستان کے خلاف شیڈول سیریز ہمارے کرکٹ کیلنڈر کا اہم حصہ ہے۔ ریڈ بال اور وائٹ بال کرکٹ پر دونوں ممالک کے بورڈز کے درمیان مثبت اور تعمیری بات چیت جاری ہے، اور ہم مستقبل میں مزید سیریز کے انعقاد کے خواہاں ہیں۔

ٹوڈ گرین برگ کا کہنا تھا کہ آسٹریلوی ٹیم 2022ء میں ایک طویل عرصے بعد پاکستان کا دورہ کر چکی ہے، جو نہایت کامیاب اور یادگار ثابت ہوا تھا۔ “ہمیں پاکستان میں بہت اچھا استقبال ملا، اور اسی جذبے کے تحت ہم ایک اور کامیاب دورے کے لیے پُرعزم ہیں۔” چیف ایگزیکٹو کرکٹ آسٹریلیا نے کہا کہ بگ بیش لیگ میں پاکستانی کھلاڑیوں کو خوش آمدید کہنے کے خواہاں ہیں۔ ان کا کہنا تھا کہ پاکستان کے کھلاڑی دنیا بھر میں مقبول ہیں، اور اگر سرکردہ کھلاڑی بی بی ایل کا حصہ بنتے ہیں تو یہ نہ صرف لیگ بلکہ ٹیموں اور شائقین کرکٹ کے لیے بھی خوش آئند ہوگا۔ ٹوڈ گرین برگ کے مطابق پاکستان کے متعدد کھلاڑیوں سے بات چیت کا سلسلہ جاری ہے اور آئندہ بی بی ایل ایڈیشن میں ان کی شرکت کا قوی امکان ہے۔

انہوں نے مزید کہا کہ پاکستان کے پاس 22 سال بعد آسٹریلیا کی سرزمین پر کچھ بڑا کرنے کا موقع ہے۔ اگر ٹیم کے سینئر اور تجربہ کار کھلاڑی آسٹریلیا میں کھیلنے آئیں تو شاندار مقابلے دیکھنے کو ملیں گے۔