سندھ: خصوصی انسدادِ پولیو مہم کا آغاز

ترجمان ایمرجنسی آپریشن سینٹر کے مطابق کراچی کی27 ہائی رسک یونین کونسلز میں انسدادِ پولیو مہم کا پہلا مرحلہ آج سے شروع کردیاگیا ہے۔ جس کا افتتاح وزیرصحت سندھ عذرا پیچوہو نے کردیا ہے۔ طبی حکام کا کہنا ہے کہ  کثرتِ آبادی، نقل و حرکت کے باعث پولیو وائرس کے پھیلاؤ کا خطرہ برقرار ہے۔ اسی بنا پر  پہلے مرحلے میں 5 سال سے کم عمر کے 5 لاکھ 62 ہزار بچوں کو او پی وی ویکسین پلائی جائے گی۔ چار ماہ سے 5 سال کے 5 لاکھ21 ہزار بچوں کو ایف آئی پی وی ویکسین دی جائے گی۔  2024ء میں پولیو کے 24 کیسز جبکہ 2025ء میں اب تک 3 کیسز رپورٹ ہوئے ہیں۔ پاکستان میں رواں سال کا پولیو کا تیسرا کیس لاڑکانہ سے رپورٹ ہوا ہے۔ ترجمان نیشنل ایمرجنسی آپریشن سینٹر کے مطابق رواں سال کا سندھ سے یہ دوسرا پولیو کیس ہے۔  گزشتہ سال ملک میں پولیو کے 74 کیسز سامنے آئے تھے۔ ان کیسز میں بلوچستان سے 27، خیبرپختون خوا سے 22 اور سندھ سے 23 پولیوکیسز رپورٹ ہوئے تھے۔ پنجاب اور اسلام آباد سے گزشتہ سال پولیو کا ایک، ایک کیس رپورٹ ہوا تھا۔