علی امین گنڈاپور کے ناقابلِ ضمانت وارنٹِ گرفتاری معطل

راولپنڈی کی انسدادِ دہشت گردی کی عدالت نے وزیرِ اعلیٰ خیبر پختون خوا علی امین گنڈاپور کے ناقابلِ ضمانت وارنٹِ گرفتاری معطل کر دیے۔  عدالت نے علی امین گنڈاپور کے وارنٹِ گرفتاری حسن ابدال میں درج مقدمے میں جاری کیے تھے۔ جس پر علی امین گنڈاپور کے وکیل محمد فیصل ملک کی طرف سے درخواست دائر کی گئی تھی۔ موقف یہ اختیار کیا گیا کہ پشاور ہائی کورٹ نے علی امین گنڈاپور کی تمام مقدمات میں ضمانت منظور کی ہے۔ اس موقع پر  پشاور ہائی کورٹ کا حکم نامہ بھی عدالت میں جمع کرایا۔ جس پر عدالت نے علی امین گنڈاپور کے ناقابلِ ضمانت وارنٹِ گرفتاری معطل کر دیے۔ انسدادِ دہشت گردی کی عدالت نے علی امین گنڈاپور کو اشتہاری قرار دینے کی کارروائی بھی منسوخ کر دی۔