عالمی کرکٹ کپ : پاکستان کا پہلا ٹاکرا ہالینڈ کے ساتھ

پاکستان کرکٹ ٹیم آج حیدرآباد کے راجیو گاندھی انٹرنیشنل کرکٹ اسٹیڈیم میں نیدرلینڈز کے خلاف میچ سے عالمی کرکٹ کپ کی اپنی مہمات کا آغاز کررہی ہے۔ قومی ٹیم 7  برس بعد انڈیا آنے والی ٹیم ہے جس نے  حیدرآباد دکن میں کئی ٹریننگ سیشنز کیے ہیں۔حیدرآباد میں پاکستانی ٹیم ورلڈ کپ کے 9 میں سے 2 میچز کھیلے گی۔

وارم اپ میچز سے پاکستانی ٹیم کو اپنے کامبی نیشن کو تیار کرنے اور تمام کھلاڑیوں کو پریکٹس کے بھرپور مواقع ملے ہیں۔ بابراعظم کہتے ہیں کہ تیاریاں بہت بہتر ہیں۔ ہفتےبھر سے  حیدرآباد میں ہیں اور 2 پریکٹس میچز میں مختلف کامبی نیشن آزمائے ہیں اور ہر کھلاڑی کو موقع دیا ہے تاکہ دیکھ سکیں کہ وہ ہر سچویشن میں کھیل سکتا ہے۔

پاکستانی کرکٹ ٹیم کو یقین ہے کہ وہ اس عالمی کپ کا آغاز فاتحانہ انداز میں کریں گے۔  دوسری جانب پہلی مرتبہ کسی عالمی کرکٹ کپ کے میچ میں پاکستانی صحافی اسٹیڈیم میں موجود نہیں ہوں گے۔ بھارتی ویزہ پالیسی کے باعث  ابھی تک کسی پاکستانی صحافی یا تماشائی کو ویزہ جاری نہیں کیا گیا۔