چیف الیکشن کمشنرصوبائی انتخابات کرائیں

صدر پاکستان ڈاکٹر عارف علوی نے چیف الیکشن کمشنر کو خط لکھ کر اس بات کی تاکید کی ہے کہ الیکشن ایکٹ 2017 کے تحت صوبائی اسمبلیوں کے انتخابات کی تاریخ کا فوری طور پر اعلان کیا جائے۔ صدر کے مطابق الیکشن کمیشن، پنجاب اور کے پی کی اسمبلیوں کے لیے اب انتخابی شیڈول جاری کرے۔ صدر نے خط میں مزید لکھا کہ انتخابات کی صورت میں خوف ناک اور مبنی قیاس آرائیاں کسی حد تک ختم ہوسکیں گی۔ الیکشن کمیشن اس بات کا پابند ہے کہ اسمبلیوں کی تحلیل کے بعد وہ 90 دن میں انتخابات کرائے گا۔ اسی لیے اب الیکشن کمیشن کی ذمے داری ہے کہ وہ اس کام کو ترجیح بنیادوں پر کرائے۔ اگر الیکشن کمیشن یہ ذمے داری پوری نہ کرسکا تو آئین کی خلاف ورزی پر جواب دہ ہوگا۔ صدر عارف علوی کہتے ہیں کہ سربراہِ مملکت ہونے کی حیثیت سے انہوں نے آئین کے تحفظ اور دفاع کا حلف لیا ہے۔