’عشرت میڈ ان چائنا‘ کا ٹیزر، محب مرزا کا ایکشن اور ایڈونچر

2006میں نجی ٹی وی چینل سے ’عشرت باجی‘ جیسا ڈراما نشر ہوا تھا، جس نے ناظرین میں خاصی مقبولیت حاصل کی۔ اب اسی ڈرامے کے کردار یعنی عشرت کو لے کر کنگ فو مارشل آرٹ اور مار دھاڑ سے بھری فلم ’عشرت میڈ ان چائنا‘ تخلیق کی جارہی ہے۔ جس ٹیزر پرستاروں کے لیے پیش کردیا گیا۔

ٹیزر جیسے ہی جاری ہوا، اس کو خاصا پسند کیا جارہا ہے۔ بالخصوص محب مرزا کے ایکشن کو، جو اب تک مختلف ڈراموں میں رومانی اور جذباتی کردار ادا کرکے شہرت رکھتے ہیں۔ان کا یہ نیا روپ چاہنے والوں کے لیے چونکا دینے سے کم نہیں۔ فلم میں صنم سعید بھی جلوے لٹا رہی ہیں۔ جبکہ سارہ لورین کی ادائیں بھی خاص نظر آرہی ہیں۔

ان ستاروں کے علاوہ شعمون عباسی بھی ہیں۔ جبکہ لالی وڈ کے ایور گرین ولن نیر اعجاز بھی کہانی کو آگے بڑھانے میں معاون ثابت ہوں گے۔ کامیڈین مانی اور مصطفی چوہدری بھی فلم بینوں کو لوٹ پوٹ کرنے کے لیے بے تاب ہوں گے۔

فلم کی خاص بات یہ بھی ہے کہ مشہور فیشن ڈیزائنر حسن شہریار یاسین ’عشرت میڈ ان چائنا‘ کے ذریعے اب ایکٹنگ کے میدان میں قدم رکھنے جارہے ہیں اور ٹیزر دیکھنے کے بعد ایسا تاثر ملتا ہے کہ وہ اس تخلیق میں منفی کردار میں ہیں۔

فلم کی شوٹنگ تھائی لینڈ میں کی گئی ہے، جسے بہت جلد سنیما گھروں کی زینت بنایا جائے گا۔’عشرت میڈان چائنا‘ ایک الف فلمز اور ڈبل ون ڈبل ون فلمز کی پروڈکشن ہے۔ جس کی نمائش کا اب چاہنے والے بے چینی سے انتظار کررہے ہیں۔