بھارتی اداکارہ پونم پانڈے پر شوہر کا تشدد، اسپتال منتقل

بھارتی اداکارہ پونم پانڈے کے شوہر سیم بومبے اپنی ہی بیوی پر تشدد کرنے کے الزام پر ممبئی پولیس کی حراست میں ہے، اداکارہ نے الزام لگایا ہے کہ ان کے شوہر سیم بومبے نے انہیں جسمانی طور پر ہراساں کیا ہے، بھارتی میڈیا کے مطابق اداکارہ پونم پانڈے کو منگل کی صبح زخمی حالت میں اسپتال لایا گیا جہاں انہوں نے اپنے شوہر کے خلاف گھریلو تشدد کا مقدمہ درج کرایا جس کے بعد ممبئی پولیس نے سیم بومبے کو گرفتار کرلیا ہے۔ اداکارہ فی الحال اسپتال میں داخل ہیں ان کے سر، آنکھ اور چہرے پر چوٹیں آئی ہیں۔ یہ پہلا موقع نہیں کہ پونم پانڈے نے اپنے شوہر کے خلاف تشدد کی شکایت درج کرائی ہو، اس سے قبل 2010 میں پونم نے اپنے شوہر کے خلاف جسمانی ہراساں کا مقدمہ درج کرایا تھا اور شادی ختم کرنے کا فیصلہ بھی کیا تھا جبکہ بھارتی پولیس نے ان کے شوہر کو گوا کے ایک مقام سے گرفتار بھی کیا تھا۔ بھارتی میڈیا سے گفتگو کرتے ہوئے اداکارہ نے اپنے ازدواجی رشتے سے متعلق بتایا کہ سیم بومبے اکثر ان پر شدید تشدد کرتے ہیں اور ان کے ساتھ بدسلوکی سے پیش آتے ہیں۔ اداکارہ پونم پانڈے کے شوہر کا پورا نام سیم احمد بومبے ہے اور وہ ڈائریکٹر، پروڈیوسر اور ایڈیٹر ہیں۔ دونوں تین سال کی دوستی کے بعد گزشتہ سال ستمبر میں شادی کے بندھن میں بندھے تھے۔